معمر الدجاج من سارة عبد السلام

معمر الدجاج: دجاج محشي بالكسكي المغربي ومطهو في صوص البصل والجنزبيل واللوز

شكر خاص لآسيا حبيبتي على كل النصايح اللي هي قالتلي عليها عشان اليوم المغربي يطلع مظبوط وأحب أقول إن الوصفة دي فعلاً وبدون أي مبالغة من أجمل وأحلى وصفات الدجاج اللي جربتها وكل عيلتي عجبتهم جداً جداً...بجد لازم الكل يجربها



المقادير


مقادير تتبيله الدجاج

2 دجاجه صغيرة
2 بصله حمراء
6 فصوص ثوم
2 ورق لارو أو ورق غار
معلقة صغيرة كركم
معلقة صغيرة جنزبيل
معلقة صغيرة بابريكا
½ معلقة صغيرة حبهان مطحون
1 معلقة صغيرة قرفة
¼ معلقة صغيرة جوزة الطيب
ملح وفلفل أسود



مقادير الكسكسي

800 جرام كسكسي
2 معلقة صغيرة ملح
1 معلقة صغيرة قرفة
1 معلقة صغيرة جنزبيل
1 معلقة كبيرة سكر
¼ كوب لوز مقشر ومطحون ومتحمر
½ كوب زبيب
زيت زيتون
سمنه



مقادير صوص الدجاج

3 بصله حمراء مقطعه شرائح
1 معلقة صغيرة ثوم مفروم
1 معلقة صغيرة جنزبيل
½ معلقة صغيرة قرفة
رشة جوزة الطيب
½ معلقة صغيرة كركم
½ معلقة صغيرة بابريكا
1 ورقة لارو أو ورقة غار
عود قرفة خشب
½ كوب لوز مقشر



الطريقة

لتتبيل الدجاج نضيف كل المكونات في القطاعه الكهربائية ونفرم كويس لحد ما الخليط يبقى ناعم وكله يمتزج كويس، نسيب التتبيله نص ساعه قبل ما نستخدمها، بعد النص ساعه نجيب الدجاج ومن ندهن بالتتبيله من كل مكان وبين الجلد ومن الداخل والخارج، نسيب الدجاج يبات ليله في التتبيله

لتحضير الكسكسي نضيف الكسكسي في بوله كبيرة ونضيف عليه شوية زيت زيتون، نفرك بإيدينا لحد ما زيت الزيتون يوصل لكل حبه والحبوب تبدأ تنفش، نضيف كوب ماء والملح ونستمر في الفرك لحد ما الكسكسي يشرب كل المياه، نصب الكسكسي في حلة الكسكسي ونسيبه نص ساعه، أنا مفيش عندي حلة كسكسي فإستخدمت حله عادية حاطيت تحتيها صاج عشان الحرارة تكون خفيفة جداً وسيبته على نار هادية جداً، بعد النص ساعه نرجعه للبولة ونضيف كوب ماء تاني ونفرك تاني وبعدين نرجع الكسكسي على النار نص ساعه كمان، نشيل من على النار ونرجع للبولة ونضيف شوية زيت زيتون وسمنه ونفرك كويس، نضيف كل التوابل والسكر والزبيب واللوز ونسيب الكسكسي على جنب لحد ما نحشي

نرفع الدجاج من التتبيله ومن الفتحه السفلية نحشي بالكسكسي كويس ومانسيبش أي مكان فاضي يعني نملي الفرخه كويس قوي، نقفل الفتحه بعود أسنان ونربط الرجلين مع بعض وفي حله كبيرة نضيف شوية سمنة وزيت ونسيبهم يسخنوا كويس وننزل فيهم الدجاج يتحمر ومسامه تتقفل وياخد لون بني ذهبي جميل، نشيل الدجاج من الحله ونضيف البصل، نضيف عليه كل التوابل ونسيبه يطرى ويتكرمل وبعدين نضيف الثوم ونرجع الدجاج ونسيبهم شوية على النار، نضيف مياه بس مش كتير يعني منخليش الفراخ كلها في مياه ولما المياه تنقص نزود، نضيف اللوز ونسيب الدجاج يستوي في الصوص كويس

لتقديم الطبق المفروض نحط الدجاج في المنتصف وحوليه الصوص بس أنا فضل عندي كسكسي من الحشو فحطيتوا تحت الدجاج وضفت الصوص على الكسكسي وزينت باللوز


بالهنا والشفا

تم نشره في: أطباق سارة عبد السلام