مطبخ الأميرة المصرية

السلام عليكم ورحمة الله وبركاته

اهلا بيكم يا رواد المطبخ

بصراحة اليوم مش عندي اكلة معينة حابة اقدمها

انما عندي حاجة أهم,,

الموضوع جايز يكون طويل شوية ورغي شويتين بس اصبروا معايا
ان شاء الله تستفيدوا,,,

طبعا كلنا احيانا يتبقى عندنا شوية شوربة بعد الاكل
طبعا انا اقصد الشوربة النظيفة اللي في الحلة لسة
ممكن تقولولي بتعملوا بيها ايه؟؟
طبعا الشوربة دي اما شوربة لحم او دجاج او اي نوع طيور تانية
يعني كلها بروتين لانها خلاصة التسوية
طبعا حلاقي كتير اوي يقولوا عادي نرميها
مش محتاجينها خلاص
دي مجرد كوب صغير مثلا أحتاجه في ايه؟؟
أو شوية شوربة متبقية أوجع دماغي بيها ليه؟

وهنا الكارثة..!!!

ايوة كارثة طبعا بالنسبة ليا
مش بخيلة والله او حريصة هانم

انما لو تتخيلي كم الحاجات اللي بعملها بالشوربة دي مش تصدقي

شوفي معايا كدة وبعد ما اخلص ححكي لكم موقف حقيقي حصل معايا

يلا نشوف استعمالات كوب الشوربة المتبقي دة ينفعنا في ايه؟؟

اولا انتي احفظي الشوربة المتبقية دي في كيس وضعيها في الفريز

لوقت استعمالها وكل ما يتبقى منك شوربة ضعيها برضه اوعي تكسلي

وطبعا حتتجمد ويكون دة شكلها

طلعيها لما تحتاجيها وسخنيها

يلا نبدأ الاستخدامات

1_ ممكن نضيفها على الأرز بالشعرية ونسويها بيها تعطي طعم جميل جدااا ولمعان للأرز طبعا + القيمة الغذائية

2_ لتسوية المحاشي بكافة انواعها

3_ وانتي بتعملي الباشميل للمكرونة مش لازم يكون كله لبن وتكون تقيلة اوي على المعدة حطي شوربة مع اللبن في صنع الباشميل

4_ لو حتعملي صينية رقاق بتسحب شوربة كتير ممكن تستخدميها لو اتزنقتي في شوية شوربة

5_ ضيفيها على شوربة العدس بدل المية تعطي طعم اجمل وقيمة غذائية اعلى

6_ اي نوع خضار بتسويه احيانا يحتاج لاضافة الماء
لا انا مش بضيف مية خالص وبستخدم الشوربة تحافظ على الطعم وتخلي الخضار اجمل

7_ لو عنك كمية كبيرة من الشوربة خففيها بمية واسلقي فيها المكرونة
بدل المية بس لوحدها وادعيلي على الطعم اللي يجنن

8_ كنتي آخر الشهر والميزانية خلصت ومافيش لحمة عندك او دجاج
تخيلي لو عندك الشوربة دي في الفريزر حتطلعيها وتطبخي اي خضار
ويكون طعهم يجنن ونفس القيمة الغذائية
وشوية خضار جنبهم طبق ارز وسلطة وبالهنا والشفا

9_ اعملي ملوخية في اي وقت بيها

10_ برام الارز في الفرن طبعا نضيف لبن وماء
استغني عن الماء وحطي شوربة وشوفي الفرق في الطعم

11_ ودي انا عملتها والله مرة في سحور رمضان
انا بسوي الفول في البيت طبعا لما يطلع من الثلاجة يكون متماسك ويحتاج مية عشان التسخين
حطيت شوربة بدل المية مع فصين ثوم وطماطم مقطعة وفلفل اخضر مقطع وليمون وملح وكمون
مش حقولك الطبق اتمسح دة اتنسف نسف يومها
وما قلتلهمش السر ايه

حاجات كتيرة اوي اكتر مما تتخيلي
يعني الشوربة بجد بتغير طعم أكلاتك للأحلى
حتقولي مكبرة الموضوع
هو فعلا كبير لما تستخدميها وتشوفي الفرق
امانة عليكي اوعى ترمي اي شوية شوربة في الحوض
لو نصف كوب صغير حتلاقي له استخدام رائع

الموقف ,,, مش ناسية
كنت مرة في فرح ابن عمي وكان فيه طباخ
طبعا الطباخة اللي جوايا اشتغلت وقعدت اغلي ولازم ادخل للطباخ اشوف بيعمل ايه
اتسحبت بشويش كدة ورحت داخلة طبعا افتكروني واحدة بتدور على حتة لحمة ولا حاجة
لكن بالصدفة وانا داخلة اسمع الطباخ يقول للراجل اللي معاه خد الحلة دي كبها,,,
يالهوي ,, يرمي ايه حلة مثلا عرضها مترين ومليانة شوربة
اتجننت ولقيت نفسي اصرخ فيه
انت رايح تعمل ايه,, استنى هنا
ورحت مشمرة اكمامي تعالى
سألت الطباخ انت عملت الارز قال لسة
عملت المكرونة قال لسة
عملت الخضار قال لسة
قلت له وبترمي الشوربة بتاعت بقرة كدة عادي
وقفت معاه ساعتين والكل يدور عليا برة
وانا جوة عايشة حياتي مع الطباخ
وقلت له على استخدامتها والله شكرني وبعد ما خلص الاكل
واتعشينا كلنا دخلت للطباخ قلت له فيه فرق ولالا
قالي طبعا يامدام منكم نستفيد
ويومها علمته كمان حاجات تانية يعملها كله بثوابه

عرفتوا بئا أهمية شوية الشوربة اللي نرميها
يلا مين حتقول لي استخدام تاني للشوربة