تجهيزات رمضان 2 ( اعداد اللحوم وتتبيلها وتفريزها)

كفتة : تجيبى اللحمة المفرومة وتبليها وتجهزيها وتعملى جزء منها كور علشان داوود باشا وترصصيها جنب بعض فى الطبق الفيبر وتحطى الطبق فى كيس نايلون وتدخل الفريزر 

2- وتعملى جزء منها صوابع وتخرميها من النص بأيد المعلقة الخشب وترصصيها جنب بعض فى الطبق وتحطى الطبق فى كيس نايلون ودى تبقى كفتة للشوى 

3- وتعملى جزء منها من غير ما تخرميها من النص ودى تبقى للصينية 

فراخ مشوية او صينية : تغسلى الفرخة وتنضفيها وتفتحيها من ضهرها بالطول بالسكينة و تتبليها تمام وتحطيها بنفس الطريقة

فراخ بانية : تحيبى شرائح الصدور البانية ونعملها بالبيض والبقسماط وترصصيها فى الطبق بس تحطى كيس نايلون بين صفوف الفراخ علشان ما تلزقش فى بعض

بفتيك بانية : نفس طريقة الفراخ البانية بس تدقى البفتيك الاول بالمدق المخصوص 

صيتية المكرونة بالبشاميل : تعمليها تمام وبعدين تحطيهافى صينية فويل وتدخليها 

الفريزر الاول من غير ما تغطيها لحد البشاميل اللى على وشها ما يجمد وبعدين تغطيها بورقة فويل ( علشان البشاميل وهو طرى حيلزق فى الغطاء ) ولما تيجى تستعمليها قبل ما تدخليها فى الفرن تضربى البيضة بالشوكة و تحطيها على الوش

 صينية المسقعة: بنفس طريقة المكرونة اللى بالبشاميل 

 اللحمة المفرومة :نعمل العصاج عادى بدون الصلصة وبعد ما يبرد نحطة فى اكياس نايلون بس بكميات مش كبيرة يعنى على أد صينية واحدة بس (سواء رقاق .سواء بطاطس بيورية

 صينية اللازانيا : نفس طريقة المكرونة بالبشاميل 

كفتة الفراخ : تتعمل عادى وتتصبع وتتحط عادى فى البيض والبقسماط وتترصص فى الاطباق الفل بجانب بعض

 الكبيبة الشامى : بعد ما تكوريها ترصصيهم فى الطبق الفيبر وتحطيهم الاول لحد ما يجمدوا وبعدين ترصصيهم جنب بعض وتحطى الطبق فى كيس نايلون 

 فراخ مسلوقة. اسلقى فرخة عادى ولما تبرد لفيها فى ورقة فويل وتطلعيها عالاستخدام على طول و تكونى حاطة الشوربة بتاعتها فى برطمان معاها

الحواوشى : بعد ما تحشى الرغيف تلفية فى ورقة الفويل ولما تستخدمية تطلعية على الفرن على طول 

 السمبوسك والسبرينج رول :بعد ما تحشيهم ترصصيهم فى الطبق الفيبر وتطلعيهم على التحمير

 الكبيبة الصينية : تعمليها فى صوانى المونيوم وتحطيها فى كيس وعلى الفريزر

تم نشره في: سحور وفطور