الجمبرى المشوى بطريقتى الخاصه الشيف ايمن العطار

الجمبرى المشوى او الجريل بطريقه سهله وبسيطه من الشيف ايمن العطار
الجمبرى الجريل او المشوى ايمن العطار
هنجيب الجمبرى وياريت يكون الحجم الكبير او المتوسط وبعد كده ننضفه كويس وطريقه تنضيف الجمبرى كالاتى بمسك الجمبرى من ظهره وبفتح بالسكينه الصغيره بطول ظهر الجمبرى وبشيل اللى جوه الظهره بعد كده بغسل الجمبرى وبسيب القشر والراس طبعا لانه مشوى
المارنيه بتاع الجمبرى وده اهم حاجه هو ده اللى عايزكم تاخدوا بالكم منه اوى
شبت مفروم وكزبره خضرا مفرومه عصير ليمون مسطرده والمسطرده مستحبه اوى فى الاسماك عموما وثوم مفروم ملح فلفل ابيض كمون كزبره ناشفه زيت بسيط اوى عشان خلط المارنيه وبخلط كل المكونات دى مع بعضها
مرحله التتبيل بمسك الجمبرى واحده واحده واحط مارنيه من اللى انا عملته ده فى مكان ظهر الجمبرى المفتوح طبعا بعد التنظيف وبعد كده بحط الجمبرى فى باقى المارنيه او التتبيله واسيبه حوالى نصف ساعه فى التتبيله مش اكتر من كده عشان الجمبرى مش يتهرى منى وبعدين على الجريله وببتدى اشوى الجمبرى واللى مش عنده جريله ممكن طاسه فى زيت بسيط اوى وياريت الجمبرى مش يستوى زياده مننا لانه فايدته بتقل جدا لو استوى اكتر من اللازم يعنى مش اكتر من 5 دقايق على الجريله على درجه حراره متوسطه ويكون لونه زى مهوريكوا فى الصوره كده انا كمان حاطط فى الصوره صوص ليمون بالزبده وده رائع مع الاسماك عموما وسهل اوى فى طاسه صغيره بحط عصير 4 ليمونه وبعد على النار وبعده بحط حوالى نصف فنجان كريمه لبانى وبعدين حوالى ربع كيلو زبده مقطعه قطع صغيره وبقلب على نار هاديه لحد ميعمل قوام للصوص وبعدين احطه على الجمبرى فى الطبق او تحت الجمبرى زى مهتشوفوا فى الصوره وبقدم معاه ارز سمك وبس كده اتمنى ان الطريقه تكون سهله وبالهنا والشفا ايمن العطار

تم نشره في: وصفات الشيف أيمن العطار