الدكتورة علا عبد المنعم وحوار رائع وشيق عن موهبة الطبخ

الصورة دي لمجلة المانية نشرت وصفة لضيفة حوارنا اليوم/  الدكتور علا عبد المنعم

انسانة مثقفة ومن خلال متابعتي لها  في صفحتها عرفت انها انسانة محترمة جدااا وست بيت ماهرة 

اتمنى لها التوفيق في حياتها واسرتها

شدتني اني اعمل معها حوار لمعرفتها اكثر  لاني لاحظت اهتمامها الشديد بالمطبخ والطبخ  وعمل وصفات لا يمكن ان نوصفها الا انها رائعة عن جد ..

بصراحة لما راسلتها عشان اعمل معاها حوار رحبت  بكرم اخلاقها وتواضعها 

جزاها الله كل الخير

يلا نتابع حوارها الشيق الذي تميز بالسلاسة والهدوء

1_ ممكن تعرفينا بنفسك ؟ دراستك .. جنسيتك .. مكان اقامتك .. الحالة الاجتماعية ؟

أنا علا عبد المنعم .. دكتورة اطفال معايا ماجيستير وقربت اخلص دكتوراه  الحمد لله من المانيا انا عندي 36 سنة متزوجة وعندي 3 اطفال 7 و5 و3 سنوات .. انا مصرية من المعادي بالقاهرة وعايشة في فرانكفورت بالماليا من خمس سنوات

2_ دكتورة علا انا لاحظت من متابعتي لحضرتك ان عندك صور كتيرة اوي لاكلات رائعة .. ممكن تكلمينا عنها ؟ وامتى بدات فكرة تصوير الاكلات ؟

انا بدأت اطبخ بجد بعد الجواز عشان دراستي في كلية الطب مكانتش مخلياني اساعد اوي في المطبخ بس كنت طول عمري بحب أألف اكلات .. انا بعد الجواز كنت بعمل الاكل التقليدي اللي كل امهاتنا بتعمله بس بعد دة ابتديت ابتكر واخترع لما جيت المانيا من خمس سنوات كان عندي فراغ شديد في الاول بدأت اجيب كتب طبخ كتير واعمل وصفات منها وكنت بذوق الناس بيقولولي اكلك حلو اوي فكرت بعد كدة لما دخلت عالم الفيس بوك من سنتين اني اصور الاكل وانزل الوصفات عشان اساعد ستات البيوت في عمل وصفات حلوة اوي وسهلة وسريعة انا بحب جدااا الاكل السريع ومعنديش وقت كتير للاكل اللي بياخد وقت طويل وكانت نيتي خالصة لله اني اساعد البنات والستات انهم يعملوا اكل المطاعم في البيت وبفلوس قليلة اوي 

 

3_ مين علم حضرتك الطبخ وفنونه ؟ وهل لاحد دور في وصولك لهذا المستوى الرائع ؟
 ربنا يخليكي انا مستوايا مش رائع ولا حاجة انا كل يوم بتعلم طبعا ماما هي اللي معلماني اساسيات المطبخ وبعدين انا طورت نفسي بالكتب

4_ طبعا لاحظت حبك للمطبخ وصنع اكلات كتيرة ياترى امتى اول مرة دخلتي المطبخ واول حاجة عملتيها كانت ايه؟
اول مرة دخلت المطبخ  كنت مع ماما وانا بعمل تورتة عيد ميلادي وانا عندي تقريبا 9 او 10 سنوات ماما كانت تعمل الكيك وانا افتح من النص وازوق ودي كانت اسعد لحظات حياتي وانا بساعد ماما وهي بتعمل التورتة .. والسليزون او السندويتشات بتاعت عيد الميلاد اول حاجة عملتها كانت السليزون بتاع عيد ميلادي جبته من كتاب صغير اسمه فن الطهي وكان طعمه جميل اوي اوي
 

5_ ماهي تطلعاتك وطموحاتك في مجال الطبخ ؟ هل ستكتفي بنشرها في الفيس بوك فقط؟
انا اصلا دكتورة والطبخ هواية جميلة بحب انشر في الفيس بوك عشان اساعد الناس ونفسي اوي اوي اعمل كتاب لوصفاتي السهلة والسريعة حسميه ( وجبات 30 دقيقة ) عشان كل الامهات اللي عندها ولاد وبتشتغل ونفسي برضه اني اقدم برنامج في التلفزيون للاطفال الصغيرين ازاي يعملوا لنفسهم كل حاجة بطريقة مبسطة لان كل الاكلات والحلويات ممكن تتعمل بطريقة مبسطة وسهلة وحتى لو عملت في يوم من الايام كتاب حفضل احط وصفاتي على الفيس بوك

 

6_ هل وجودك في بلد خارج مصر اثر على طريقة اكلك ام ما زلتي محتفظة بطابعنا المصري المميز في الاكلات؟

انا اتعلمت من الالمان البساطة في الاكل يعني هما هنا بياكلوا لحمة وفراخ بس في الويك اند مش لحمة كل يوم اكلهم اليومي في الغداء عبارة عن شوربة وعيش باجيتي و سلطة وعصير محدش بياكل زينا ارز وطبيخ ولحمة وفراخ كل يوم انا بحاول ابسط الاكل على اد ما اقدر عشان يبئا اسرع وصحي وسهل  بس طبعا بطبخ الاكل المصري وبموت فيه زي الملوخية وورق العنب دي احلى اكلة عندي

 

7_ اكلة ابتكرتيها بنفسك كان اسمها ايه ومكوناتها ؟
مافيش اكلة معينة  انا ابتكرتها يعني الاكل كله معروف من زمان بس هي الاضافات اللي كل واحدة بتضيفها لاكلها هي اللي بتخلي الاكل مميز  يعني مثلا طريقة الكاب كيك المعروفة انا عارفة الاساس .. وبزود نكهات وفواكه للكب كيك وحتطلع حاجة جديدة خالص بردو البيتزا عجينتها واحدة بس انا ممكن االف في التوبينج حتطلع حاجة جديدة كل مرة وهكذا س اكتر فكرة انا عملتها من نفسي كانت لازانيا .. بعجينة الجلاش وكانت رائعة والكل حبها 

 

8_ الطبخ فن ام هواية عند حضرتك؟
الطبخ هواية بحبها وبرضه فن يعني المثل بيقول العين بتاكل .. انا مقتنعة اوي بكدة يعني لمسات بسيطة اوي وحوالين الطبق حتخليه حاجة شهية وتفتح النفس

9_ ايه رأيك في برامج الطبخ في مصر ؟ ومالفرق بينها وبين برامج الطبخ في الغرب؟ ؟
برامج الطبخ في مصر جميلة جداا وانا بتابع كتير منها  مافيش فرق كتير بين البرامج برة وفي مصر الفرق بس في نوع الاكل .. برة الاكل بتاعهم ابسط كتير من اكلنا واحيانا البرامج برة بيبئا فيها امكانيات اكتر في الاجهزة مثلا 

 

 

10_ ياترى اكبر عدد طبختي له كان كام ؟ يعني اقصد عزومة مثلا كانت كبيرة كان عددها كم واحد ؟ وايه الاصناف اللي دايما تحبي تقدميها في العزائم؟
اكبر عدد عملته كان حوالي عشرين دايما في اي عزومة لازم يكون فيها شوربة وسلطة عصير او كولا .. وحلويات .. والطبق الرئيسي طبعا ... انا مش معايا اني اعمل اصناف كتير يعني الواحد لو شرب طبق شوربة وقطعة فراخ ومكرونة بالباشميل مثلا  وشوية سلطة حيشبع جدااا حيبئا فيه مساحة للحلو وشاي بعد الاكل ودة برضه اليل اتعلمته هنا في المانيا الناس بتعمل اكل فرد .. قطعة فراخ واحدة مثلا وارز وسلطة بس كدة ..

 

11_ هل لو عرض على الدكتور علا ان تقدم برنامج للطبخ توافق؟
طبعا اوافق 

 

12_ نطلع بعيد شوية عن الطبخ والمطبخ .. ونتكلم في السياسة شوية
هل كنتي موجودة اثناء الثورة المصرية ؟ وازاي شايفة مستقبل مصر من وجهة نظرك ؟
انا مكنتش موجودة بس ان شاء الله متفائلة اوي بمستقبل مصر خصوصا اننا بدانا اول طريق للديموقراطية عن طريق الانتخابات 

 

 

13_موقف محرج حصل معاكي طبعا في المطبخ ؟
أسوا موقف حصل لي كنت في مصر .. قبل ما يدخل الغاز وكانت عندي عزومة وبعمل فتة .. ووطيت على الرز عشان يستوي ورحت اجهز السفرة ولما جه الضيوف وجيت اغرف الارز اكتشفت ان الانبوبة كانت خلصت والرز اتنقع في المية وعجن جدا جدا وكان مستحيل يتاكل اضطريت ارميه واعمل رز جديد  واستنينا شوية تاني

 

14_ هل فيه سؤال توقعتي اساله لحضرتك وما سألتوش ؟ ايه هو ؟
مافيش انا كنت متوقعة اسئلة اقل من كدة اصلا .. بس كنت حابة اقول ان انا اتنشرلي وصفة في مجلة المانية الشهر اللي فات وكانت فرحتي بيها كبيرة اوي اوي ..

 15_ دكتورة علا ممكن تكلمينا عن موضوعك اللي اتنشر في المجلة الالمانية؟
ابدا دي حكاية بسيطة الصورة عندي في الحائط بتاعي .. والمجلة دي معمولة بمشاركات القراء .. يعني بينزلوا والي 60 وصفة كل مرة من الاعضاء ..وانا بعت لهم وصفة .. وهما بيختاروا احسن الوصفات وينشروها واختاروا وصفتي وحطوها وياربت يختاروا وصفة تانية الشهر الجاي

 

16_ واخيرا كلمة من الدكتورة علا ايه؟ ولمين توجهها ؟ 

احب اشكر مطبخ الاميرة لانكم ادتوني الفرصة اتعرف على ستات البيوت الحلوين ويارب اقدر افيدهم واحب اشكر كل اصحاب الجروب على الفيس بوك .. لانهم بجد بيشجعوني اوي اوي وهما اللي بيحمسوني اني اطبخ دايما واخيرا طبعا لجوزي وولادي وبابا وماما وبقولهم بحبكم اوي

 ولا يسعنا في النهاية الا ان نشكر ضيفتنا الاخت الفاضلة / دكتورة علا 

 اسعدتينا بتواجدك وردودك السهلة البسيطة ..

تم نشره في: حوارات مطبخية