4/13/2012 12:11:00 ص
كل سنة وأنتم طيبين.. كلها كام يوم وييجي شم النسيم وطبعا أنتم عارفين إن شم النسيم بيتميز بأكلات معينة جميلة جدا......
ومن اشهرها البيض الملون
ومن اشهرها البيض الملون
البيض الملون بأكتر من لون أكيد كلنا يوم شم النسيم بنحب
نفطر بيض ملون، والنهارده هنشوف مع بعض إزاي ممكن نلون
البيض بأكتر من لون بطريقة طبيعية ميه في الميه باستخدام
الأعشاب الطبيعية والخضروات والفواكه...
لو عايزه تلوني البيض باللون البنفسجي
يبقى استخدمي عصير العنب المركز هتلاقيه في "السوبر
ماركت" وضيفي إليه كمية كبيرة من ورق البصل الأحمر.
لو عايزه تلوني البيض باللون الأزرق يبقى استخدمي عصير
التوت المركز هتلاقيه في "السوبر ماركت" وضيفي إليه ورق
الكرنب الأحمر.
لو عايزه تلوني البيض باللون البمبي بدرجاته المختلفة
وصولا للون الأحمر يبقى استخدمي البنجر الأحمر وضيفي إليه
عصير فراولة مركز وقشر البصل الأحمر وكركديه.
لو عايزه تلوني البيض باللون الأصفر بدرجاته
وصولا للبرتقالي يبقى استخدمي أوراق البصل البرتقالي أو قشر
الموالح زي البرتقال أو اليوسفي وضيفي إليه الجزر المبشور
أو الكمون أو الكركم.
لو عايزه تلوني البيض باللون الذهبي يبقى استخدمي قشر
التفاح الأصفر وضيفي إليه أوراق البقدونس.
لو عايزه تلوني البيض باللون الأخضر يبقى استخدمي أوراق
السبانخ والبقدونس.
لو عايزه تلوني البيض باللون البني يبقى استخدمي القهوة أو
الشاي المغلي.
الطريقة:
دي أبسط وأسهل طريقة ممكن تعمليها علشان تحصلي على الألوان اللي أنت عايزاها...
1. هتسلقي البيض عادي جدا زي ما أنت بتسلقيه.
2. أثناء ما البيض بيتسلق هتملي إناء ميه وتضيفي إليه معلقة
صغيرة خل علشان تثبت اللون، بعد كده تضيفي إليها أي
إضافات من اللي إحنا قلنا عليها على حسب اللون اللي أنت
عايزاه، وتسيبي الميه بالإضافات دي تغلي كويس أكتر من مرة
علشان الميه تتلون باللون اللي أنت عايزاه. بعد كده اطفي
البوتاجاز...
3. سيبي الميه الملونة لغاية ما تبرد وبعد كده ضيفي إليها
البيض المسلوق وسيبيه فيها لمدة خمس دقائق أو لغاية ما
تلاقي إن البيض اتلون بلون الميه.
تقديم البيض الملون بأكتر من طريقة:
وعلشان يوم شم النسيم يكون فعلا يوم مميز في كل شيء دلوقتي هانقولك على أكتر من طريقة ممكن تستخدميها في تقديم
البيض على السفرة يوم شم النسيم....
1_ممكن تجيبي طبق فاكهة أو حامل تورتة وتحطي فيه أوراق
خس وبعد كده ترصي فوق أوراق الخس دي البيض الملون أو
غير الملون.
أو2_ تجيبي طبق زجاج وترصي فيه البيض الأبيض وتحطي
بين كل بيضة والتانية بعضا من الزهور زي ما أنت شايفة كده.
3_كمان ممكن تجيبي أصيص فيه نباتات خضراء وتحطيه على
السفرة وتحطي فيه البيض غير الملون أو الملون.
4_وممكن كمان تجيبي أي سلك عندك تكوني مش محتاجة له
وتلفيه على شكل عش عصفورة وتحطيه على السفرة وتحطي
فيه البيض الملون أو غير الملون.
5_دي كمان طريقة جديدة ممكن تسخدميها في شم النسيم وهي
إنك تجيبي براد الشاي وتحطي فيه مجموعة من الزهور
الطبيعية أو الصناعية وتحطي بجوار براد الشاي مجموعة من
الفناجين وتحطي في كل فنجان بيضة من البيض الملون اللي
عندك وجنب كل بيضة تحطي وردة
تم نشره في: أكلات شم النسيم
المشاركات
0 التعليقات:
إرسال تعليق
ضع تعليقك هنا