1/16/2012 08:37:00 م
لكل شيخ طريقة .. أثناء تجولي في النت شاهدت الكثير من طرق الملوخية منها ما عجبني ومنها وجدته غريب عن الملوخية المصرية الأصيلة ...
اصل الملوخية دي في مصر عندنا حكاية عشق من قديم الأزل ... قربنا نأخدوها حقن عضل من كتر حبنا فيهااااا
وعندي زوجي عاشق لها بيشربها مش بياكلها :)
ومهما عملت وجددت فيها من طرق مافي اجمل من طريقة مامتي وجدتي من قبلها .. والتقلية اللي ريحتها تجيب آخر الشارع والكل يعرف ان البيت دة حد عامل فيه ملوخية
ودي كانت مقدمة عن عشق وحب الملوخية المصرية الأصيلة ويلا ندخل على الطريقة المتوارثة جيل بعد جيل وخصوصا الشهقة :)
طبعا انتي بعد ما تغسلي الملوخية وتتركيها تنشف وبعدين تخرطيها اما بالمخرطة وتعيشي دور ستي وستك
او بالكبة والطريقة الحديثة انتي وراحتك المهم يكون فيه ملوخية في النهاية :)
يلا نبدأ الخطواااات مع بعض عشان نحصل على طبق ملوخية حكااااااااااااية
نغلي الشوربة على النار مع فصين ثوم مقطعين وملعقة صغيرة كسبرة ناشفة في الشوربة برضه تغلي معاها قبل مانحط الملوخية
وطبعا نظبط الملح والفلفل الاسمر
دلوقتي نضيف الملوخية للشوربة ( وكانت ستي تعمل صوت غريب كدة بشفايفها وهي بتحطها وكنت اضحك عليها بس وانا بعملها بلاقي نفسي بعمل نفس الصوت وابص حوليا اشوف حد سمعني ولالا :)
نقلب الملوخية في الشوربة لحد ماتفك بس بلاش نقلبها كتير
ونتركها تغلي غلوتين بس واقفلي النار وشوفي الملحوظة دي للي بتسقط منهم الملوخية
( لا نترك الملوخية فوق البوتاجاز بعد ما نقفل النار ولا نغطيهااااا ابداا عشان ماتسقطش منك تحت والشوربة تطلع فوق )
يلا نجهز التقلية الخطيرة
ثوم مفروم + كسبرة ناشفة + ملعقة سمن بلدي
وعلى النار نحمرهم وبعدين نضيفهم للملوخية مع الششششششههههههقة الكبيييييييييييرة
ونغطي الملوخية شوية ..( عاوزة تاخديها غلوة تاني براحتك .. انا مش بغليها اغطيها شوية بس واقدمها )
ونقدمها مع ارز ابيض
وبالهنا والشفاااااااااااا
تم نشره في: أكلات مطبخ الأميرة
.jpg)
المشاركات
