رول السوسيس من سارة عبد السلام

رول السوسيس


شكراً إسلام حبيبتي على وصفتك الجميلة والسهلة، العجينة دي يا جماعه تنفع لجات كتير قوي وسهلة وسرعه وتتعجن بالإيد بدون أي مشاكل، أنا مشيت على وصفة أم البنات بالظبط مع تعديلات بسيطة جداً


المقادير

كيلو دقيق
1 معلقة صغيرة بودرة ثوم
1 معلقة صغيرة بودرة بصل
1 معلقة بابريكا
1 معلقة كبيرة بردقوش
½ كوب جبنة بارميزان والمكون ده إختياري
معلقة و نصف صغيرة بيكنج بودر
3 معالق صغيرة خميرة
3 معالق كبيرة حليب بودرة
معلقة صغيرة ملح
نصف معلقة سكر
ماء حسب ما يحتاج العجين، أنا إحتجت كوب وربع
أي نوع سوسيس...هوت دوج...فرانكفورتر
1 بيضة مخلوطة مع معلقة صغيرة كريمة أو حليب ورشة نسكافيه


الطريقة

أولاً ننشط الخميرة، نخلط السكر مع الخميرة ونصب عليهم مياه دافية كويس، نقلب لحد ما الخميرة تدوب خالص وتبدأ تتفاعل وتعلى، نسيبها على جنب تنشط كويس

نخلط كل المكونات الجافة والجبنة البارميزان مع بعض، نعمل فرة في النص نضيف فيها الخميرة والمياه ونبدأ نخلط وننعجن، نضيف المياه شوية شوية علشان متزيدش عن الحاجه ونبدأ نعجن في كل الإتجاهات علشان نمدد الجلوتين اللي في الدقيق ونخلى العجينة تنعم وتبقى زي الحرير، نشيل العجينة في طبق ونغطيها بفوطة مبلولة بمياه دافية ونسيبها في مكان دافي تخمر لحد ما يتضاعف حجمها

أول ما العجينة تختمر كويس نشيلها من الطبق إلى سطح مرشوش بالدقيق خفيف ونبدأ نعجنها شوية كمان لحد ما نحس إنها بقت مطاوعه وسهلة في الإيد جداً، نفردها بالنشابة رفيع قوي ونبداأ نقطع بالسكينة شرائح طويلة ومتوسطة العرض من العجين، نلفها حلزوني على السوسيس، نرص في صينية ونسيبه يرتاج شوية كمان، ندهن وش كل رول بخليط البيض وندخله فرن متوسط الحرارة لحد ما الوش يحمر والجناب تاخد لون ذهبي خفيف

نكون مجهزين علبة محكمة الإغلاق ومفرود جواها فوطة نظيفة ونطلع الرولز من الفرن على العلبة دي علطول ونقفل العلبة كويس، الرطوبة اللي في العلية حتخلي العجينة تفضل طرية لمده طويلة ومتنشفش من الهوا.


وبالهنا والشفا

0 التعليقات:

إرسال تعليق

ضع تعليقك هنا

 
Design by Free Wordpress Themes | Bloggerized by Lasantha - Premium Blogger Templates | :