ملف كامل لنصائح لو عندك عزومة ما تقلقيش ..ادخلي واعرفي حتعملي ايه



عندك عزومة!!
وحاسة إنك متلخبطة!! 
ومش عارفة تعملي إيه؟!
  نفسك في أي حد يساعدك ويقول لك تعملي إيه؟! 
يلا نحضّر للعزومة مع بعض


-1-
حددي عدد المعزومين
أول خطوة المفروض إنك تعمليها هي إنك تحددي عدد المدعوين أد إيه بالضبط؟!

وعلى الأساس ده هتبدأي تحددي كمية الأكل اللي هتعمليه، وخدي بالك إن لو كان عدد المعزومين قليل؛ يعني مثلاً 3 أفراد هيبقى عدد الأصناف قليل ومحدود...؛ لكن لو عدد المعزومين كبير هيبقى فيه تنوع في الأصناف المقدمة، وده علشان ترضي جميع الأذواق...
-2-
حددي أصناف الأكل
الخطوة اللي بعد كده هي إنك تحددي أصناف الأكل اللي المفروض تكون موجودة على السفرة..
وده جدول بيحتوي علي قائمة بالأنواع اللي المفروض أنها تكون على السفرة في أي عزومة...

أولاً: السلطات


شوفي يا ستي المفروض يكون عندك على السفرة في أي عزومة نوعين من السلطات، وليكن مثلاً طبق سلطة طحينة وطبق سلطة خضراء.

ثانياً: الشوربة


كفاية أوي في عزومة رمضان وجود نوع واحد من الشوربة؛ خاصة لو كان عدد المعزومين مش كبير؛ لكن لو عدد المعزومين كبير يبقى اعملي نوعين أو ثلاثة...

ثالثاً: اللحوم
طبق اللحوم ده بيعتبر من الأطباق الرئيسية على السفرة علشان كده لازم يكون على السفرة في أي عزومة نوعين من أنواع اللحوم، وليكن مثلاً طبق بوفتيك لحمة وطبق فراخ مشوية.

رابعاً :النشويات




النشويات زي: الأرز أو المكرونة أو المحشي، لازم تكون موجودة على السفرة، بس يا ريت تكتفي في عزومة رمضان بوجود نوع واحد من النشويات.. يعني إما مكرونة أو رز، أو أكتر من صنف من أصناف المحشي.


خامساً: الخضار


يا ريت إنك تعملي نوعين من أنواع الخضار في عزومة رمضان علشان ترضي جميع الأذواق.
سادساً: الحلويات


أكيد لو عندك عزومة هتقضي وقت كبير جداً في عمل الأكل، علشان كده اختاري الحلويات السهلة في التحضير أو اختاري الأصناف اللي ممكن إنك تعمليها قبل العزومة بيوم... زي البسبوسة أو أي نوع من الحلويات اللي بتتقدم باردة زي الآيس كريم أو المهلبية أو الأرز باللبن.

-3-

جهزي للعزومة قبل يوم العزومة


يا ريت إنك قبل العزومة بيوم تجهزي أدوات المطبخ زي "الصواني والأطباق والكوبايات والكاسات"، وتتأكدي من نظافتها؛ بحيث إنها تكون جاهزة على الاستعمال...
كمان ابدأي في تحضير الأكل قبل العزومة بيوم... طبعاً هتسألي نفسك دلوقتي، وتقولي: إزاي أحضر الأكل قبلها بيوم، كده الأكل يبوظ؛ خصوصاً إن الجو حر أوي اليومين دول؟!
هاقول لك: إن فيه حاجات ممكن إنك تجهزيها قبل العزومة بيوم وتحطيها في التلاجة...
وده جدول بالحاجات اللي ممكن إنك تحضّريها قبل العزومة بيوم..


العصائر



ممكن إنك تعمليها وتحطيها في كوباية كبيرة وتحطيها في التلاجة أو تحطيها في أكياس وتحطيها في الفريزر وتطلعيها يوم العزومة قبل المغرب بخمس ساعات.




إعداد بعض الوجبات



في بعض الوجبات ممكن إنك تجهزيها وتحطيها في التلاجة زي المحشي على سبيل المثال؛ ممكن إنك تجهزيه وتلفيه وتحطيه في التلاجة؛ بحيث يكون جاهزاً على التسوية يوم العزومة.

تتبيل اللحمة أو الفراخ

لو هتقدمي في العزومة لحمة أو فراخ مشوية ممكن أنك تتبليهم ببصل قبل العزومة بيوم وتحطيهم في وعاء بلاستيك وتسيبيهم في التلاجة؛ بحيث يكونوا جاهزين على الشواء يوم العزومة.

تعصّجي اللحمة

لو هتعملي مكرونة بالبشاميل أو جلاش باللحمة المفرومة يبقى يا ريت إنك تعصّجي اللحمة قبلها بيوم.
إعداد الحلويات

الحلويات كمان ممكن تعمليها قبل العزومة بيوم وتحطيها في التلاجة، ومن الحلويات اللي ممكن إنك تعمليها الآيس كريم والبسبوسة والبقلاوة.. وخدي بالك إنك تغطي صينية البسبوسة أو البقلاوة كويس.

-4-
إعداد باقي الأصناف يوم العزومة

  ملاحظه مهمة جدااااا

1- لما تعملي عزومة مافيش دايى للافتكاسات يعنى الاختراعات بالعكس اعملي الحاجات العادية التقليدية المجربة (بصراحة كمان علشان ما تحرجيش الضيف افرض عملتيله سلطة مايونيز بالشامبينيوه وطلع يا حبة عينى ما يعرفش غير المحشى بتاع امه يبقي كدة احرجتيه ولا لأ ) ايه رأيك وعلشانك انتى برضه افرضي باظت منك لا قدر الله


2- اعملي الحاجات اللي سهلة في التقديم والغرف والاكل يعنى كل ما تعملى حاجة تتاكل بالايد او الملعقة اقصي حاجة (شفتى اقصى حاجة الملعقة ) يبقي احسن علشان مش هايسرك قوى منظر ضيوفك وهما محتارين ومكسوفين مش عارفين يغرفوا حاجة او ياكلوها

3
- الحلويات برده ابعدى عن الكريمات والملزقات (يعنى الحاجات اللي بتبوظ ايد الواحد بسرعة ) والمدلعات فاهمانى طبعا (برده علشان ما تتعبيش في التقديم للناس)

4
- العصاير خليها حاجة اساسية علشان الواحد بيحب يشرب حاجة بعد الاكل
وخليها برده حاجة تقليدية ومعروفة


اساسيات لازم طبعا تقديم شوربه سلطات مخللات عشان لو نسيت حاجه وطبعا الخبز وعصاير وحاجه حلوه
ودي نماذج من عزومات  ممكن تعملييها
نقول اول عزومه

بفتيك وفراخ محمره صينيه رقاق باللحم
مكرونه بيض استكلندى
شوربه لسان عصفور
سلطات(خضره -زبادى-طحينه)
بطاطس شيبس
ومخلل
الحلو كوكتيل



تانى عزومه

ارز معمر بالفرن
فراخ بالفرن
تورلى لحم وخضار
جلاش باللحم المفروم
وسمبلوسه بالخضار والجبن وشوربه لسان العصفور والسلطات والمخللات




ثالث قائمه

شيش طاووك او فراخ بانيه
لحم مسلوق ومحمر وشوربه خضار
صينيه كوسه بالبشاميل
سمبوسه او بيف باسترى محشى الى يعجبك
وطبعا السلطات والمخللات
والحلو جلى بالفواكه




رابع قائمه

كفته لحم يا مشويه يا محمره

صينيه فراخ بالبطاطس
مكرونه بالصلصه ممكن كمان باللحم المفرووم
شوربه عدس وممكن تقطعى الخبز وتحمصيه ويقدم معاه
والسلطات والمخللاتوطبعا عصاير والحلو انا بفضله خفيف كوكتيل جيلى بالفواكه مثلا



عزومه اخرى
السلطات
سلطة خضرا + وبابا غنوج +وسلطة فاصوليا او بطاطس

المقبلات
سمبوسة باللحمة المفرومة والسبانخ

الشوربة
شوربة خضار
الاطباق الرئيسية

كفتة
فراخ في الفرن
لحمة كباب حلة

الخضار
بامية او اي صنف خضار

الاطباق الجانبية
محشى كوسة او مشكل +جلاش باللحمة المفرومة

ارز طبعا طالما فيه خضار مطبوخ


الحلو :اي كيكة او تشيز كيك +فروت سلاط او كوكتيل

العصاير (مافيش احسن من عصير البرتقال دايما طازة وحلو وممكن عصير فراولة)





ده بقى حاجه اسبيشيال موش لاى حد
منيو ابن بلد
السلطات:
سلطة خضرا +باذنجان مخلل + سلطة زبادي

الاطباق الرئيسية :
ممبار
فتة كوارع
طحال
مخ


الاطباق الجانبية

محشى ورق عنب


الشوربات :
شوربة خضار

العصائر :
عصير برتقال

الحلو :
مهلبية او ارز باللبن

فواكه

دى بقى عزومه سمك

السلطات(خضرا بابا غنوج"سلطه زبادى بالخيار"سلطه طحينه)

الشوربه شوربه سى فود(ممكن شويه سمك مقطع على شويه جمبرى وشويه كالمارى )وماتكتريش موش الكل بيحبها

سمك مشوى ومقلى (ياعادى او فيليه نوع واحد)

الجمبرى او سبيط بكزا طريقه حسب الامكانيات
فيه ناس بتحب السمك التعابين
الارز صياديه او احمراو ارز بالبصل

وطبعا العصاير والحلو الى يعجبك



دى عزومه عملتها فى رمضان ونالت الاعجاب

مبدئيا السلطات والمخلللات والشوربه انا بفضل لسان العصفور

عكاوى بطريقه اسامه السيد كانت تحفه وخلصوها(لو ناس منكم وعليكم سيبوها بعضمها) لو حد غريب يبفضل انكم تفصصصوها
ممبار
وطبعا فراخ للى موش يحب العكاوى وملوخيه
وخبز وارز وعملت صينيه واحده مكرونه بالبشاميل للظروف

الحلو عملت بسبوسه هايله وكنت عامله كاستر بالمكسرات
كده انا خلصت ياريت اى واحده عملت عزومه تقولنا عملت ايه عشان كلنا نستفيد

6 التعليقات:

غير معرف يقول...

هايل مع الشكر

raafat abdelkarim يقول...

نسلموا..........بجد شكرا

raafat abdelkarim يقول...

نسلموا..........بجد شكرا

غير معرف يقول...

شكرا لكي كفيتي ووفيتي والله

وصفات طبخ يقول...

الان من خلال موقع باتية وانترية تعلموا طريقة عمل السينابون بكل سهولة , زوروا هذا الموقع الان .
http://www.pntre.com/how-amel-sauce-cinnabon/

hotelrestaurant يقول...

دليلك الشامل اكبر موقع الذى يدلك على جميع تجهيزات مطابخ وباقل سعر واعلى الخامات والاشكال
للاستفسار زورو موقعنا الالكترونى
http://hotelrestaurant36.blogspot.com.eg/2016/09/blog-post.html


إرسال تعليق

ضع تعليقك هنا

 
Design by Free Wordpress Themes | Bloggerized by Lasantha - Premium Blogger Templates | :