فطائر البف بيستري بالنوتيلا من سارة عبد السلام

المقادير

بف بيستري
نوتيلا
بندق مفروم خشن
بيضة مخفوقة


الطريقة

نقطع البف بيستري على شكل مربعات أو أي شكل تاني نحبه، نضيف معلقة مليانه نوتيلا في الوسط ونرش فوقها شوية بندق وبهدين ندهن الأطراف بالبيض ونقفل كويس ونضغط الأطراف بشوكة عشان نتأكد إنه مقفول كويس، نقليها في شوية زيت أو ندهنها زبده وندخلها الفرن، تقدم دافئه


وبالهنا والشفا

تابع القراءة »

تم نشره في: أطباق سارة عبد السلام

فطاير التفاح بالبف بيستري من سارة عبد السلام

فطاير التفاح بالبف بيستري


المقادير

عبوة بف بيستري كبيرة
¼ كوب زبده سايحه
1 بيضة مضروبة شوية


مقادير حشوة التفاح

3 تفاحات متوسطة
½ كوب عصير تفاح
¼ كوب سكر
2 معلقة صغيرة قرفة
¼ معلقة صغيرة جوزة الطيب
¼ معلقة صغيرة قرنفل
½ معلقة صغيرة فانيلا
¼ كوب زبيب
زبده



الطريقة

لعمل الحشوة نقشر التفاح ونقطعه مكعبات صغير جداً، ننقع التفاح في عصير التفاح علطول عشان لونه ميتغيرش، نسخن شوية زبده ونشوح فيها التفاح مع إضافة السكر وكل التوابل، نسيب التفاح على النار لحد ما تنشف كل المياه اللي فيه ونضيف الزبيب، نشيل من على النار ونضيف الفانيليا ونسيب الحشو يبرد خالص قبل ما نستخدمه

نفرد العجينه رفيع ونقطعها دوائر أو أي شكل تاني نحبه، نضيف شوية حشو في النص وندهن الأطراف بالبيض ونقفل كويس مع الضغط بشوكة عشان نتأكد إنها مش حتفتح في الفرن

نجيب صينية خبز وندهتنها بزبده، ندهن كمان كل الفطاير بزبده من الناحيتين ونرصهم على الصينية، نخبز في فرن ساخن لحد ما يبقى لونهم ذهبي جميل، نطلعهم من الفرن ونسيبهم يرتاحوا 10 دقائق قبل التقديم، وممكن تقدم مع آيس كريم فانيليا أو كريمة


وبالهنا والشفا

تابع القراءة »

تم نشره في: أطباق سارة عبد السلام

قالب التونه من سارة عبد السلام

المقادير لقالبين

توست بدون الأطراف
3 علب تونه متصفيه من الزيت
2 بيضه مسلوقه مقطعه صغير
2 طماطم بدون البذر مقطعه مكعبات
2 فلفل أخضر مقطع مكعبات
1/4 كوب بصل أخضر مقطع
فصين ثوم مفرون ناعم
1/2 كوب زيتون أخضر مقطع صغير
2 معلقة كبيرة نعناع أخضر فريش مفروم
معلقة كبيرة أوريجانو فريش
عصير 2 ليمونه خضراء
1/4 كوب مايونيز
1 معلقة كبيرة مسطرده
رشة فلفل أسود
1 معلقة صغيرة بابريكا
1/2 معلقة صغيرة أوريجانو جاف


للتزيين

ثوم معمر أو بقدونس
شرائح ليمون


الطريقة

نخلط كل المكونات مع بعض كويس ونسيبهم على جنب، في القالب نرص التوست طبقة وندهنها بالمايونيز خفيف وبعدين نحط التونا فوقها ونكمل طبقة تانية توست وهكذا لحد ما يكون عندنا 3 طبقات توست وطبقتين تونا، نقلب القالب في طبقة التقديم وندعن الوش بالمايونيز ونزوق بالبقدونس أو التوم المعمر وشرائح الليمون


وبالهنا والشفا

تابع القراءة »

تم نشره في: أطباق سارة عبد السلام

كيكة البقسماط من سارة عبد السلام

كيكة البقسماط

المقادير

4 بيضات
3/2 كوب زيت
كوب بقسماط
1 1/2 كوب دقيق
2 معلقة كبيرة بيكنج بودر
كوب سكر
2 معلقة صغيرة فانيليا سائلة
علبة عصير راني بالخوخ


الطريقة

نخلط كل المكونات الجافة ونسيبها على جنب، نخلط البيض والزيت والفانيليا نضرب كويس جداً لحد ما لون البيض يفتح خالص، نضيف المكونات الجافة تدريجياً لحد ما كل المكونات تمتزج كويس جداً. ندهن صينية الخبز بالزبده ونصب خليط الكيكة فيه، نخبز الكيكة على نار هادية لحد ما تستوي خالص، نطلعها من الفرن ونسيبها تبرد خالص، نسقي الكيكة بعصير الراني ونضرب شوية كريمة مع شوية عصير وسكر بودرة وفانيليا ونغطي الوش بيها، نغطي الكريمة بأي فاكهه نحبها


وبالهنا والشفا

تابع القراءة »

تم نشره في: أطباق سارة عبد السلام

سمك فيليه بصوص الكريمة والليمون من سارة عبد السلام

سمك فيليه بصوص الكريمة والليمون

مقادير تتبيلة السمك

1 كيلو سمك فيليه مقطع قطع كبيرة
معلقة كبيرة ثوم مفروم
معلقة صغيرة بابريكا
1/2 معلقة صغيرة بودرة ثوم
1/2 معلقة صغيرة بودرة جنزبيل
عصير 2 ليمونه
ملح وفلفل أسود

لطبقة الدقيق

2 كوب دقيق
2 معلقة صغيرة بودرة ثوم


لخلطة الكريمة

500 مللي كريمة
فص ثوم مهروس
1/2 معلقة صغيرة بودرة ثوم
عصير 2 ليمونة
رشة جوزة الطيب
ملح وفلفل أسود


الطريقة

نخلط كل مكونات تتبيله السمك وسيب السمك يتبل نص ساعة، نخلط الدقيق وبودرة الثوم ونغطي كل قطع السمك بالدقيق ونقليها لحد ما تبقى ذهبي في شوية زيت، نرص السمك في طبق الخبز، نسخن الكريمة ومعاها الثوم وكا التوابل وفي الآخر خالص نضيفلها الليمون، نغطي السمك بخلطة الكريمة وندخله الفرن على نار حامية لحد ما الوش يبقى ذهبي


وبالهنا والشفا

تابع القراءة »

تم نشره في: أطباق سارة عبد السلام

رول الدجاج المحشي من سارة عبد السلام

رول الدجاج المحشي

المقادير لرول واحد

أولاً: تتبيله الدجاج

دجاجة كاملة مخلية مع جلدها
صدر دجاجه بدون عظم
2 بصله مفرومة ناعم
1 معلقة صغيرة ثوم مفروم
½ معلقة صغيرة قرفة
½ معلقه صغيرة فلفل أسود
½ معلقة صغيرة توابل دجاج
رشة جوزة الطيب


ثانياً: حشوة الرز

½ 1 كوب رز مصري مغسول ومتصفى من المياه
¼ كوب زبيب
½ كوب مكس مكسرات
بصلة كبيرة مقطعه صغير
معلقة صغيرة ثوم
½ معلقة صغيرة فلفل أسود
1 معلقة صغيرة قرفة
¼ معلقة صغيرة جوزة الطيب
ورقة لارو أو ورقة غار
2 قرنفل
1 حبهان
½ كوب مرقة دجاج
سمنة


الطريقة

لتحضير الدجاج نجيب صدر الدجاجة المخلي ونفتحه بسكينة حامية عشان يبقى شريحه رفيعه، نخلط كل مكونات التتبيلة ونسيبها ترتاح نص ساعه، ندعك الدجاج كويس جداً بالتتبيله ونسيبها تبات ليلة كاملة عشان تتبل

لتحضير الحشو، نسخن شوية سمنة ونشوح فيهم البصل ومعاه كل التوابل، نضيف الثوم والرز ونقلب كويس عشان الخلطة تمتزج كويس، نضيف المرقة ونسوي الرز نص سواه مش اكتر، نشيلة من على النار ونضيف المكسرات والزبيب ونسيبه يبرد خالص

دلوقتي نحشي الدجاج، على ورق ألمونيوم نفرد الدجاجه الكاملة وحنلاحظ إن في مناطق من الدجاجه اللحم فيها قليل جداً وأحياناً حتي بيكون في جلد بس، نبدأ نملى المناطق الفاضية دي بقطع من صدر الدجاجة المخلي اللي فتحنا عشان يكون رفيع، نضيف على الوش شوة الرز والمكسرات ونلف الرول بورق الألمونيوم ضيق جداً ونشد كويس، نجهز صينية كبيرة نملاها مياه مغلية ونحطها على النار وننزل فيها رول الدجاج عشان البخار يخلي يمسك وميتفتحش في الفرن، نشيل الرول من المياه أول ما يمسك ونسيبه يبرد خالص ويفقد أي حرارة فيه، نطلع الرول من الألمونيوم لما يكون برد ونحطه في صينية خبز وندهنه بشوية سمنة أو زبده، ندخله الفرن يستوي ووسه يحمر ويبقى جميل، يقدم مع رز بالخلطة وملوخيه


وبالهنا والشفا

تابع القراءة »

تم نشره في: أطباق سارة عبد السلام

الكانيلوني بالجبنة الريكوتا والسبانخ من سارة عبد السلام

الكانيلوني بالجبنة الريكوتا والسبانخ

مقادير الكانيلوني والحشو

علبة باستا كانيلوني
400 جرام سبانخ مجمده
400 جرام جبنة ريكوتا
1 معلقة صغيرة ثوم مفروم
¼ كوب كريمة
½ كوب جبنة بارميزان
¼ كوب أوراق ريحان
2 معلقة كبيرة زيت زيتون
بيضة
رشة جوزة الطيب
ملح وفلفل أسود


مقادير صوص الطماطم أو صوص المارينارا

8 طماطم طرية بودون قشر ومقطعه ناعم
500 مللي مرقة دجاج
2 معلقة كبيرة صلصة طماطم
¼ كوب زيت زيتون
1 معلقة كبيرة ثوم مفروم
1/3 كوب ورق ريحان
1 مرقة لارو
3 أعواد زعتر فريش الساق والأوراق
¼ معلقة صغيرة رقائق فلفل أحمر حار
1 معلقة كبيرة سكر
2 معلقة صغيرة بابريكا
2 معلقة صغيرة أوريجانو جاف
ملح وفلفل أسود


باقي المقادير

200 مللي كريمة
½ 1 كوب موتزاريلا
½ كوب بارميزان



الطريقة

لعمل صوص الطماطم نشوح الثوم في ويت الزيتون ونتبله بالفلفل الأحمر وأول ما ياخد لون ذهبي ننزل عليه الطماطم المفرومة مع باقي المقادير ونسيبه على نار عاليه يغلي 10 دقائق، نوطي النار ونسيب الصوص ربع ساعه على نار هادية وبعدين نغطيه ونسيبه كمان نص ساعه وكده يكون صوص المارينارا جاهز

لتجهيز الحشو، نعصر السبانخ كويس جداً عشان نطلع منها أي مياه زياده وكمان نصفي الجبنة من أي سوائل فيها، نضيف كل المكونات لمحضر الطعام الكهربائي ونخلط كويس لحد ما يتكون وزيج ناعم ومخلوط كويس جداً، ننقل الخليط لكيس حلواني أو حتى كيس بلاستيك للأكل ونضغط الحشو لتحت ونعمل فتحه صغيرة في طرف الكيس من تحت عشان نحشي

نجيب طبق خبز مش بيلزق ونضيف في القاع 3 أكواب صوص مارينارا، نبدأ بحشو الكانيلوني بكيس الحلواني أو الكسي البلاستيك ونتأكد من إن كل وحده مليانه كويس جداً ومفيش فيها أي فراغ، نصب على الوش كوب أو إثنين صوص طماطم تاني وفوقهم الكريمة وفوقها الموتزاريلا والبارميزان، نغطي بورق فويل مش لامس الوش وندخله الفرن لحد ما وحدات الكانيلوني تستوي وتشرب من الصوص كويس وبعد كده نفتح الفويل ونخلي الوش يحمر وباخد لون ذهبي جميل، نطلع من الفرن ونسيب الكانيلوني يرتاح 10 دقائق على الأقل قبل التقديم


وبالهنا والشفا

تابع القراءة »

تم نشره في: أطباق سارة عبد السلام

خلية نحل البطاطس والدجاج من سارة عبد السلام

خلية نحل البطاطس والدجاج

 

مقادير طبقة البطاطس

½ 1 كيلو بطاطس مسلوقة
4 معالق كبيرة زيت زيتون أو أي زيت نباتي
معلقة كبيرة ثوم مفروم
معلقة كبيرة أوريجانو
رشة جوزة الطيب
¼ كوب بقدونس مفروم
مكعبات متوسط الحجم جبنة شيدر صفراء


مقادير طبقة الدجاج

500 جرام صدور دجاج مقطعة مكعبات متوسطة
بصلة كبيرة مقطعة صغير
مشروم مقطع شرائح والكمية حسب الرغبة
معلقة صغيرة بودرة ثوم
½ معلقة صغيرة بابريكا
معلقة كبيرة أوريجانو
رشة جوزة الطيب
مكعب ماجي
ملح وفلفل أسود
زيت وشوية زبده


مقادير خلطة الكريمة

250 مللي كريمة
معلقة كبيرة زبده
معلقة صغيرة ثوم مفروم ناعم
رشة ملح وفلفل أسود
رشة جوزة الطيب
½ معلقة صغيرة أوريجانو



الطريقة

لتحضير الدجاج نضيف الزيت والزبده ومعاهم البصل بعدين نضيف الدجاج مع كل التوابل ومكعب الماجي، قبل ما تستوي بشوية صغيرة نضيف المشروم ونسيبها تكمل سواها. نسيبها على جنب تبرد.

لتحضير طبقة البطاطس نهرس البطاطس كويس مع كل التوابل والثوم والبقدونس والزيت وناخد 1/3 الكمية نفردها في طبق الخبز، فوق طبقة البطاطس نضيف الدجاج والمشروم، ناخد الباقي من البطاطس ونشكله على شكل كور متوسطة الحجم ونحشي كل كورة بمكعب جبنه شيدر، نرص كل الكور فوق الدجاج على شكل خلية.

لتحضير الكريمة نسخن الكريمة مع كل المكونات على نار متوسطة لد ما توصل للدرجة اللي قبل الغليان علطول، نصب كل الكريمة على البطاطس في طبق الخبز زندخلها الفرن لحد ما وشها يبقى ذهبي جميل ونقدمها ساخنة جداً


وبالهنا والشفا

تابع القراءة »

تم نشره في: أطباق سارة عبد السلام

كب كيك الشوكولاته بكريمة النعناع من سارة عبد السلام

كب كيك الشوكولاته بكريمة النعناع

 المقادير

2 كوب دقيق
1 كوب كاكاو
معلقة صغيرة بيكنج بودر
1/2 معلقة صغيرة بيكنج صودا
رشة ملح
كوب سكر بني غامق ناعم
كوب سكر أبيض
2 بيضة
كوب ماء دافئ
1/2 كوب حليب رايب
1/2 كوب زيت
معلقة صغيرة فانيليا

لكريمة النعناع

كوب كريمة خفق
ربع معلقة صغيرة روح نعناع
نص معلقة فانيليا


الطريقة

أولاً، نحضر كريمة النعناع بضرب كل المكونات بالمضرب الكهربائي لحد ما تتقل وتمسك، نشيلها في الثلاجة لحد ما يجي وقت التزوييق

لتحضير الكب كيك، نخلط كل المكونات الجافة ( الدقيق، الكاكاو، البيكنج باودر، البيكنج صودا، الملح) ونخلط كل المكونات السائله مع السكر ( السكر البني، السكر الأبيض، البيض، الفانيليا، الزيت، اللبن الرايب والماء الدافئ)، نضيف كل المكونات الجافة على المكونات السائله ونخلط كويس جداً، نجهز صينية الكب كيك ونحط فيها الأكواب الورق ونملى كل كوب ورق لحد الثلاث أرباع ونخبز في فرن هادي لحد ما تستوي، نطلع الكيك ونسيبه يبرد تماماً وبعدين نبدأ نزوق بالكريمة

وبالهنا والشفا

تابع القراءة »

تم نشره في: أطباق سارة عبد السلام

روول الرومي بالحمضيات والجنزبيل محشي بحشوة الرومي التقليدية من سارة عبد السلام

روول الرومي بالحمضيات والجنزبيل محشي بحشوة الرومي التقليدية

 المقادير

فيلية صدر رومي سمكه متوسط لرفيع
3 أكواب من حشوة الرومي التقليدية
عصير وبشر 2 برتقاله
عصير وبشر ليمونة سكري
عصير 1 ليمون أخضر
2 معلقة صغيرة زنجبيل طازج مبشور ناعم
1 بصلة كبيرة مقطعه شرائح
4 فصوص ثوم مقطعه شرائح
4 فروع زعتر بري طازج
1 معلقة كبيرة عسل
1 معلقة صغيرة بودرة ثوم
1 معلقة صغيرة بودرة بصل
½ معلقة صغيرة بابريكا
رشة جوزة الطيب
رشة قرفة
ملح وفلفل أسود
زبده


الطريقة

نخلط جميع المكونات لعمل التتبيلة ونفرد فيها فيليه الرومي وتترك ليلة كاملة في التتبيل، يتم تجهيز ورق ألمونيوم مفرود ونرفع فيلية الرومي من التتبيل ونزيل أي بصل أو أعشاب من عليه ويفرد على الورق الألمونيوم، يغطي لفيلية بالورق البلاستيك الشفاف ويتم ضربة بأي أداه ثقيله لفرد اللحم، نزيل البلاستيك ونضيف الحشو في المنتصف ونبدأ بلف الرول بإستخدام ورق الألمونيوم ويشد اللف جيداً، نقوم بربط الرول جيداً بخيط الجزار للتأكد من إحتفاظ الرول بشكلة وعدم خروج الحشو منه، يتبل الرول بالملح والفلفل الأسود وجوزة الطيب ويدهن بزيت الزيتون، يلف الرول جيداً بطبقتين من ورق الألمونيوم ويدخل فرن ساخن لمده 30 دقيقة، يخرج الرول من الفرن ويتم إزالة ورق الألمونيوم ودهن الرول بالزبده ويدخل الفرن مرة أخرى ليحصل على لون ذهبي، عند إخراج الرول من الفرن يتم لفة بورق الألمونيوم لمده 10 دقائق أو ربع ساعه، بقطع الرول شرائح ويقدم


وبالهنا والشفا

تابع القراءة »

تم نشره في: أطباق سارة عبد السلام

قالب اللحمة المفرومة بنكهة برجر الجبنة من سارة عبد السلام

المقادير

700 جرام لحمة مفرومة

1 بصله متوسطة مقطعه صغير
1 فلفل أحمر مقطع مكعبات صغيرة
1 فلفل أخضر مقطع مكعبات صغيرة
1 كوب بقسماط
1 بيضة مخلوطة
½ كوب زبادي
1 كوب شيدر مبشورة
1 معلقة صغيرة بودرة ثوم
1 معلقه صغيرة بودرة بصل
1 معلقة صغيرة بابريكا
ملح وفلفل أسود
3 معالق كبيرة صوص ورسيتشاير
½ معلقة كبيرة صوص حار توباسكو
2 معلقة كبيرة زيت زيتون
توست أبيض


مقادير التوبينج

¼ كوب كاتشب
2 معلقة كبيرة باربيكيو
1 معلقة كبيرة توباسكو أو صوص حار
1 معلقة كبيرة مسطرده


مقادير صوص الجبنة

1 كوب شيدر مبشورة
1 باكيت شوربة كريمة دجاج فورية
2 معلقة كبيرة زبده
2 معلقة كبيرة دقيق
500 مللي حليب


الطريقة

نجيب صينية طويلة بتاعة الإنجليش كيك ونرص في القاع توست أبيض، نخلط كل مكونات اللحمة وننقلها في الصينية، نضغط خفيف بإيدنا عشان تثبت، نخلط كل مكونات صوص التوبنج وندهن بيه الوش كويس، ندخلها الفرن تستوي وحنعرف إنها إستوت لما نلاقيها فصلت عن جوانب الصينية والحروف بقت بني، نسيبها ترتاح ربع ساعه كده عشان تمسك كويس

لتضير صوص الجبنة نسيح الزبده مع الدقيق ونسيب الدقيق على النار عشان نشيل الطعم الني منه، نضيف الحليب والشوربة الفورية والجبنة ونخلط كويس لحد ما المزيج يتقل ويبقى ناعم جداً، ننقل قالب اللحمة في طبق التقديم ونضيف صوص الجبنة على الوش

نجهز شوية بسلة وجزر عشان نحطهم حوالين قالب اللحمه، نشوح الجزر والزبده في شوية زبده ونتبلها بأي توابل نحبها ونحطها حوالين قالب اللحمة


وبالهنا والشفا

تابع القراءة »

تم نشره في: أطباق سارة عبد السلام

لفائف مسخن الدجاج من سارة عبد السلام

لفائف مسخن الدجاج

المقادير سلق الدجاج

750 جرام صدور دجاج
4 بصلات كبار مقطعين مكعبات صغيرة
3 ورق لارو أو روق غار
عود قرفة خشب
3 حبات حبهان
2 مكعب ماجي
ملح وفلفل أسود


بقية المقادير

½ 1 معلقة كبيرة سماق
رشة جوزة الطيب
معلقة صغيرة ثوم مفروم
¼ معلقة صغيرة قرفة
ملح وفلفل
¼ كوب صنوبر
¼ كوب زيت زيتون
خبز شراك أو عيش لبناني أو رقاق طري


الطريقة

نحط صدور الدجاج على النار في ماء بارد ونستمر في إزالة أي ريم يظهر على الوش، أو ما يبقى مفيش ريم خالص نضيف البصل وكل التوابل والماجي ونسيب الدجاج يتسلق كويس على النار. نشيل صدور الدجاج من الشوربة ونخليها تبرد على جنب، أول ما الفراخ تبرد ننسلها نسايل رفيعه وصغيرة، نصفي المرقة من كل التوابل والبصل، نخلي المرقة على جنب علشان حنحتجها تاني في الآخر، نشيل كل التوابل وورق اللارو من البصل اللي صافيناه ونحمر البصل في زيت الزيتون، نضيف كل التوابل وأول ما البصل ياخد لون ذهبي نضيف عليه الدجاج والثوم ونشوحهم مع بعض، ندوق للتأكد من التتبيل وأول ما الخلطة تاخد لون بني ذهبي نطفي عليها النار ونسيبها تبرد ونضيف عليها الصنوبر

دلوقتي نبدأ اللف، نقطع الخبز أو الرقاق مثلثات كبيرة ونسقي من المرقة اللي عندنا، نحط الخلطة في النص ونلف زي السبرمج رولز بالظبط، نجيب طبق خبز أو صينية وندهن القعر زيت ونرص فيهم اللفائق وندهن الوش بشوية زيت، ندخل الصينية فرن حامي ونسيبها لد ما الوش ياخد لون ذهبي جميل


وبالهنا والشفا

تابع القراءة »

تم نشره في: أطباق سارة عبد السلام

ستربس الدجاج الحارة مع صوص المسترده والعسل من سارة عبد السلام

ستربس الدجاج الحارة مع صوص المسترده والعسل

يا جماعه بجد الستربس دي من أحلى الستربس اللي كلتها وفعلاً أحلى من أي حاجه ممكن تجيبيها من أي مطعم ولا مجمده ولا أي حاجه من ده وسهله جداً وأنا كمان عملت كمية منها النص قليته وطلع روعه والنص التاني خبزته في الفرن تاني يوم ومجرد إني دهنت الصينية بشوية زيت ووش الستربس بشوية زيت برده وإتصدمت لما لقيت إنها طلعت ألى من المقلية كمان! يعني تاكلي منها وإنت ضميرك مرتاح وعارفة إنها مفهاش أي دهون تقريباَ ومفيده جداً فياريت الكل يخبزها مش يقليها


مقادير تتبيلة الدجاج

500 جرام صدور دجاج مخلية وبدون جلد
¼ كوب صوص توباسكو حار
½ معلقة صغيرة بابريكا
½ معلقة صغيرة بودرة ثوم
½ معلقة صغيرة بودرة بصل
2 معلقة كبيرة حليب رايب
ملح وفلفل أسود


مقادير الكرست

½ كوب حليب رايب
150 جرام كورن فليكس
½ كوب جبنة بارميزان
1 معلقة كبيرة أوريجانو
1 معلقة صغيرة بابريكا
½ معلقة صغيرة بودرة ثوم
½ معلقة صغيرة بودرة بصل
½ معلقة صغيرة فلفل أسود


مقادير صوص المسترده بالعسل

1/3 كوب زبادي
1 معلقة كبيرة مايونيز
¼ كوب مسترده
2 معلقة كبيرة عسل وممكن تقليل أو زياده الكمية حسب الذوق
ملح وفلفل أسود



الطريقة

تقطع صدور الدجاج شرائح سميكة وتتخلط كل مكونات التتبيله وتترك قطع الدجاج فيها ساعتين على الأقل ويفضل ليلة كاملة

لتحضير صوص المسترده نخلط كل المكونات ونسيبه لحد ما يستوي الدجاج

لتحضير الكرست ننقل اللبن الرايب في طبق عميق وفي محضر الطعام نضيف كل المكونات الباقية ونطحن بس نخلي الخليط خشن مش ناعم عشان يبقى كريسبي جداً بعد كده

نحط قطع الدجاج في اللبن الرايب ومنه على الكورن فليكس، نضغط كويس عشان الكرست تمسك ونجيب صينية خبز ندهنها زيت ونرص قطع الدجاج وندهن وشها أو نرشة بشوية زيت، نخبز لحد ما اللون يبقى ذهبي والكرست تبقى كريسبي وجميله ونقدم مع صوص المسترده والعسل


وبالهنا والشفا

تابع القراءة »

تم نشره في: أطباق سارة عبد السلام

دجاج محشي رز الجامسين مع تشكيلة خضروات مشوية في الفرن من سارة عبد السلام

وجبة الصينية الواحده: دجاج محشي رز الجامسين وتحتهم تشكيلة خضروات مشوية في الفرن



مقادير الدجاج والتتبيله

2 دجاجه صغيرة
¼ كوب زيت زيتون
2 معلقة كبيرة أوريجانو
½ معلقة كبيرة بابريكا
1 معلقة صغيرة بودرة ثوم
1 معلقة صغيرة بودرة بصل
1 معلقة صغيرة فلفل أسود
½ معلقة كبيرة ملح
¼ معلقة صغيرة جوزة الطيب
¼ معلقة صغيرة قرفة
2 معلقة صغيرة توابل دجاج


مقادير الرز للحشو

2 كوب رز جاسمين
بصله كبيرة مفرومة
2 ورقة لارو أو ورقة غار
6 قرنفل
2 حبهان
1 عود قرفة
2 معلقة صغيرة كركم
½ 1 كوب مرقة دجاج
سمنة
ملح


مقادير الخضروات

أي تشكيلة خضروات مقطعه قطع كبيرة
زيت زيتون
بابريكا
أوريجانو
ملح وفلفل أسود



الطريقة

نغسل الدجاج وننشفه من أي مياه، نخلط كل التوابل مع زيت الزيتون لحد ما يتكون عندنا خليط سميك زي المعجون، نقسم الخليط ده بالنص على الدجاجتين وندعك الدجاج ونفركة كويس بخلطة التوابل من جوه وبره وتحت الجلد كمان لحد ما كل مكان في الدجاجه يوصله التوابل، نسيب الدجاج في التلاجه يتبل لحد ما نخلص الرز والخضروات

دلوقتي نجهز الحشو، نغسل الرز كويس ونسيبه منقوع في المياه 20 دقيقه، في شوية سمنة نشوح البصل مع كل التوابل لحد ما البصل يدبل ويبقى شفاف، نضيف الرز ونشوحه 5 دقائق مع البصل والتوابل، نضيف مرقة الدجاج ونسيب الرز يشربها ومنقلبوش خالص إلا لما يشرب كل المرقة، نسيب الرز على جنب يبرد كويس قبل ما نحشي بيه الدجاج

لتجهيز الخضروات نضيفلها شوية زيت زيتون وبابريكا وأوريجانو وملح وفلفل أسود ونخلط كويس، نسيب الخضروات على جنب تتبل لحد ما نحشي الدجاج

نبدأ الحشي، نجيب الدجاج ونحشي التجويف كويس وكمان تحت الجلد وأي مكان ممكن يتحشي، نعمل رجلين الدجاج كروس ونربطهم كويس ونلف الرباط حولين الدجاج عشان نمسك الجنحان، نرص الدجاج في الصينية وحواليه الخضروات، بالفرشة ندهن صدر الدجاج بسوية زيت خفاف جداً ونرش الصدر بالملح والفلفل الأسود وندخلها الفرن ساعه ونص تستوي، لما نطلعها من الفرن نسيبها ترتاح 10 دقائق وبعدين نقدم وبجد حتاكلوا ألى أكله في ياتكوا


وبالهنا والشفا

تابع القراءة »

تم نشره في: أطباق سارة عبد السلام

مسقعة بالخل والثوم من سارة عبد السلام

مسقعة بالخل والثوم

 
المقادير

5 حبات باذنجان مقشرين ومقطعين شرائح
5 فلفل أخضر مقطعين إرباع وبدون بذر
3 حبات فلفل أحمر حار
6 طماطم بدون قشر مقطعين مكعبات صغيرة جداً
¼ كوب خل أبيض
1/3 كوب ثوم مقطع شرائح
زيت ذرة أو عباد شمس
زيت زيتون
ملح وفلفل أسود



الطريقة

في طاسة كبيرة نضيف زيت خضروات ونقلي الباذنجان وبعديه الفلفل الأخضر والفلفل الأحمر نقليه سليم، نسيب كل الخضروات تتصفى على جنب

في حلة عميقة نضيف شوية زيت زيتون ونقلي الثوم وأول ما لونه يبدأ يبقى ذهبي نضيف الخل ونسيبهم دقيقة على النار، ننزل عليهم الطماطم وأول ما تبدأ تغلي نضيف الباذنجان والفلفل الأخضر والفلفل الأحمر، نسيبهم يغلوا بعدين نتبل بملح وفلفل أسود ونوطي النار خالص ونسيبهم متغطيين على النار لحد ما يتقلوا وكل النكهات تختلط، يتسابوا في الثلاجه يبرده وتقدم بارده مع خبز


وبالهنا والشفا

تابع القراءة »

تم نشره في: أطباق سارة عبد السلام

السمك المقلي على الطريقة المصرية من سارة عبد السلام

السمك المقلي على الطريقة المصرية

المقادير

5 سمكات بلطي
2 فلفل أخضر حار
2 معلقة كبيرة شبت مفروم
2 معلقة كبيرة كزبرة مفرومة
6 فصوص ثوم
عصير ليمونة
2 معلقة كبيرة زيت زيتون
2 معلقة صغيرة كمون
1 معلقة صغيرة بابريكا
½ معلقة صغيرة شطة خشنة
1 معلقة صغيرة بودرة ثوم
ملح وفلفل أسود


مقادير الكرست

1 كوب دقيق
½ معلقة كبيرة بابريكا
ملح وفلفل أسود


الطريقة

نفتح السمك من عند البطن ونشيل كل الأحشاء، نغسل السمك كويس من جوة بالذات ومن بره كمان بمياه وملح، ننشف السمك من أي سوائل وبسكينة حامية نعمل شقين في نص السمكة بس بدون ما نقطع السمكة خالص

نحط كل مكونات التتبيلة في الهون وندق كويس جداً لحد ما كل المكونات تطحن خالص وتبقى ناعمة شوية، ناخد التتبيلة دي نقسمها على كل السمكات ونحظها في تجويف السكة اللي نضفنا، ندعك السمك من جوة كويس بالتتبيلة وندعك من بره كمان ونتأكد إن التتبيلة دخلت في الشقوق اللي عملناها بالسكينة

نخلط الدقيق مع كل التوابل ونغطي بيه السمك من بره كويس، نقلي السمك في زيت مش عميق ويكون سخن كويس لحد ما يتحمر وياخد لون ذهبي جميل، نصفيه كويس من الزيت ونقدمة مع رز وسلطة طحينة


وبالهنا والشفا

تابع القراءة »

تم نشره في: أطباق سارة عبد السلام

كيكة بودنج الشيكولاته والقهوة من سارة عبد السلام

كيكة بودنج الشيكولاته والقهوة

 
مقادير الصوص

1 ½ كوب ماء مغلي
2 معلقة صغيرة قهوة فورية (نسكافيه)
1/3 كوب سكر أبيض
1/3 كوب سكر بني
1/3 كوب بودرة كاكاو


مقادير الكيكة

¾ كوب دقيق
¼ كوب بودرة كاكاو
1/2 كوب سكر أبيض
رشة ملح
2 معلقة صغيرة بيكنج باودر
بيضة كبيرة
4 معالق كبيرة زبدة سايحة
1/3 كوب حليب
1/3 كوب زبادي
معلقة صغيرة فانيليا
½ كوب كسرات مفرومة (أي نوع تفضبي وممكن بدون مكسرات خالص)


الطريقة

أولاً ندهن طبق الخبز بالزبدة ونسخن الفرن لـ 350 درجة.

لعمل الصوص نخلط الماء والقهوة الفورية وفي طبق أخر نخلط السكر البني والسكر الأبيض والكاكاو.

لعمل الكيكة ننخل الدقيق مع الكاكاو مع الملح مع البيكنج باودر. في طبق تاني نخلط البيض والسكر والزبدة السايحة والحليب والفانيليا. نخط المكونات الجافة مع السائلة لحد ما يمتزجوأ تماماً. في حالة إضافة مكسرات نخلطها مع نفس الخليط ونفرد في طبق الخبز. فوق خليط الكيكية نرش خليط السكر البني والسكر الأبيض والكاكاو بالتساوي ونضب فوقهم الماء المخلوط بالقهوة. نخبز الكيكة لحد ما تتنفخ والصوص على الوش يتقل ويتكثف.

تقدم ساخنة مع آيس كريم فانيليا أو كريمة.

تابع القراءة »

تم نشره في: أطباق سارة عبد السلام

فطيرة شرائح البطاطس المحشية بالبصل من سارة عبد السلام

فطيرة شرائح البطاطس المحشية بالبصل


المقادير

6 حبات بطاطس مقشرين ومقطعين شرائح بسمك ½ سنتيمتر
3 بصلات مقطعين شرائح
4 فصوص ثوم مقطعين شرائح
1 ورقة لارو أو غار
½ معلقة كبيرة سكر
رشة جوزة الطيب
1 معلقة كبيرة زعتر بري طازج
1 كوب مرقة دجاج مخلوط مع 1 معلقة صغيرة بودرة ثوم


الطريقة

يشوح البصل في الزبده مع ورق اللارو ورشة ملح وفلفل وجوزة الطيب. نخفض الحرارة ونضيف السكر ويترك البصل ليتحول للون البني ويتكرمل على نار هادئة، عندما يصل للون المطلوب يرفع من على النار وتزال ورقة الغار ويترك جانباً

ندهن طبق خبز دائري بالزبده ونبدأ برص شرائح البطاطس، نرش البطاطس بالملح والفلفل الأسود وجوزة الطيب ونضيف شرائح الثوم وقطع صغيرة من الزبده، نضيف البصل المتكرمل ونفرده فوق البطاطس، نضيف الطبقة الثانية من البطاطس ونرش فوقها الملح والفلفل الأسود وجوزة الطيب وقطع صغيرة من الزبده، نخبز في فرن حار جداً لمده 10 دقائق ثم نضيف مرق الدجاج على البطاطس ويترك في الفرن حتى يتم النضج، لظة الخروج من الرفن نضيف الزعتر البري الطازج ونقدم


وبالهنا والشفا

تابع القراءة »

تم نشره في: أطباق سارة عبد السلام

سمك موسى بصوص الثوم والليمون والشبت من سارة عبد السلام

سمك موسى بصوص الثوم والليمون والشبت

 

المقادير

5 سمكات موسي فيليه
ملح وفلفل أسود
زيت نباتي
زبده


مقادير الصوص

350 مللي حليب
2 معلقة كبيرة دقيق
2 معلقة كبيرة زبده
6 فصوص ثوم مفرومين
200 مللي كريمة
¼ معلقة صغيرة شطة خشنة
1 معلقة صغيرة بودرة ثوم
رشة جوزة الطيب
ملح وفلفل أسود
¼ كوب عصير ليمون
1/3 كوب شبت مفروم


الطريقة

نغسل السمك بمياه وملح وننشفه كويس من أس سوائل أو رطوبة، نتبل كل وش بالملح والفلفل الأسود

لعمل الصوص نسيح الزبده ونضيفلها الدقيق ونص كمية الثوم، نسيبهم على النار شوية وبعدين نضيف الحليب تدريجياً، نضيف كل التوابل ونقلب بإستمرار، الصوص حيتقل أول ما يغلي وساعتها نوطي النار ونضيف الكريمة، نسيبهم على النار دقيقتين وبعدين نشيل من على النار ونضيف الشبت وعصير الليمون وباقي كمية الثوم

دلوقتي نسوي السمك، في طاسة كبيرة نضيف شوية زيت ومعاهم كمية كبيرة من الزبده، أول ما يسخنه نضيف السمك ومنقلبش غير مرة واحده هشان منكسرش السمك، أول ما يتحمر السمك وياخد لون ذهبي نضيف القليل من المياه وده حيساعد إن السمك يبقى طري وإن الزبده متتحرقش،لما كل المياه اللي ضفناها تتبخر نقلب على الناحية التانية ونكرر بالظبط نفس الخطوات، نشيل من على النار ونقدم السمك ساخن مع الصوص ورز أبيض


وبالهنا والشفا

تابع القراءة »

تم نشره في: أطباق سارة عبد السلام

هوت دوج تشيز لوفرز بيتزا من سارة عبد السلام

هوت دوج تشيز لوفرز بيتزا

الوصفة الرائعه دي لشيف دعد أبو جابر وبجد أحلى عجينة بيتزا جربتها في حياتي وطريقتها منتهى السهولة...شكراً شيف دعد على طريقتك الأكتر من ممتازة


أنا فكرت في طريقة غريبة شوية لخبز البيتزا بعد ما عرفت إن أفران البيتزا مش كويسة قوي وفشلت تماماً في إني أعرف أشتري حجر بيتزا من مصر فحاولت أوجد حل بديل، جبت بلاط كان فاضل عندينا من فترة وغسلته كويس خبزت البيتزا عليه على الناحية البورسلين وكانت الفكرة ناجحة جداً والخبز طلع مظبوط زي مكاعم البيتزا بالظبط فأنصح الكل إنه يجرب الفكره دي


مقادير العجينة

3 كوب دقيق منخول
3 معلقة كبيرة زيت زيتون
2 معلقة صغيرة خميرة جافة فورية
1 معلقة صغيرة سكر
1 معلقة كبيرة ملح
1 ½ كوب ماء دافئ


مقادير صوص الطماطم

4 طماطم طرية
2 معلقة كبيرة ثوم مفروم
1 معلقة كبيرة معجون طماطم
¼ كوب روق ريحان
2 عود زعتر كامل زعتر طازج
1 معلقة صغيرة بابريكا
ملح وفلفل أسود
زيت زيتون


إضافات البيتزا

هوت دوج
فلفل أصفر
فلفل أحمر
بصل
مشروم
زيتون
جبنة شيدر مبشورة
موتزاريلا



الطريقة

لعمل العجينة نفرك الدقيق بزيت الزيتون باليد، نضيف كل المكونات الجافة ونخلط جيداً. نبدأ في إضافة الماء الدافئ تدريجياً حتى يتجمع العجين وقد نحتاج كمية أقل أو أكتر من مقدار الكوب ونصف حسب نوع الدقيق والجو، العجينة يجب أن تكون ناعمة جداً وفيها شوية لزوجه يعني مش جافة تماما وبتلزق خفيف باليد، نعجن العجينة لمده 10 دقائق أو أكتر، نرش إيدينا بالدقيق ونطلع العجينة من العجانه إلى طبق عميق مرشوش دقيق، نغطي العجينة بفوطة دافية رطبة ونتركها في مكان دافئ تتخمر لمدة ساعتين

أثناء مع العجين بيختمر نعمل صوص الطماطم، نشوح الثوم مع زيت الزيتون على نار لمدة دقيقتين، نضيف الطماطم المبشورة ومعجون الطماطم والتوابل والأعشاب ونتركها تغلي 5 دقائق على نار عالية، نخفض الحرارة تماماً ونتركها لحد مع الصوص يتقل ويتركز، يترك جانباً ليبرد

ودلوقتي نجمع البيتزا، نقسم العجينة ثلاث قطع متساوية وكل قطعه حتعمل 1 بيتزا متوسطة، نرش سطح نظيف بالدقيق ونفرد الهجينة بالتشابة على شكل دائري بسمك 2 مللي تقريباً، نرش البلاطه اللي حنسوي عليها بشوية دقيق ذرة أصفر وده يمنه الإلتصاق تماماً وننقل العجينة المفروده على البلاطة، ندهن الوش بصوص الطماطم ونرش فوقها كمية من الجبنة شيدر، نضيف باقي المكونات ونسيب الموتزاريلا للآخر، ندخل البيتزا فرن حامي جدا وبعد نص السوا نطلعها ونرش طبقة موتزاريلا بعدين طبقة شيدر بعدين طبقة تانية موتزاريلا على الوش وندخلها تكمل سوا وتسيح الجبنة

أتمنى أنكوا تجربوا العجينة دي والخبز بالطريقة دي وحتشوفوا الفرق


وبالهنا والشفا

تابع القراءة »

تم نشره في: أطباق سارة عبد السلام