محشي كرنب (ملفوف ) بالصور من مطبخ الأميرة

وياسلام على طبق محشي كرنب في الجو البرد دة ... بجد روعة ..

وانت ماشي كدة في اي شارع  في مصر وخصوصا في فصل الشتاء لازم تشم ريحة محشي الكرنب خارجة من كل بيت 

وبعدين مش اي طبق محشي تقدر تاكله .. لازم يكون بطريقة ستي وستك والنفس المصري الاصيل والتكتيك العالي في عمله

وزي ما بيقولوا الاكل نفس ....

زمان كنت تلاقي الجيران اللي يعمل فيهم محشي لازم يبعت طبق لجاره .. وانا انهاردة عملت كدة بس بعت لحماتي العسولة 

وهي حكمت عليا وقالت لي تسلم ايدك يا مرات ابني

طيب عاوزاكم انتوا كمان  تحكموا على المحشي بتاعي  :) 

 

يلا نتابع المقادير والطريقة مع بعض 

المقادير

طبعا كرنبة حلوة وطازة وورقها ابيض

كيلو ارز  + البقدونس + الشبت + النعناع + الكسبرة الخضراء

3 بصلات مقطعين صغير 

كيلو ونصف طماطم ( مضروبة في الخلاط )

مرقة ( شوربة ) للتسوية 

ملح + فلفل اسمر 

زيت ذرة  او سمن  زي ما تحبوا 

انا استخدمت زيت ذرة لانه خفيف

الطريقة 

نجهز الضلمة ( حشوة المحشي ) 

نجهز صينية ونضع فيها البصل وعليه الفلفل الاسمر  ونقلبه لمدة خمس دقائق حتى يتغير لونه ثم نضيف عصير الطماطم

والملح ونغطيها تتسبك مع بعض  حتى تجف ماء الطماطم 

وهي على النار  نجهز حلة فيها ماء مغلي بملعقة ملح  لسلق الكرنبة  وطبعا كلنا نعرف ازاي نقطعها ونحافظ على الورق سليم \

نغسل الارز ونتركه في مصفاة  ونغسل  والخضرة كلها ( البقدونس والشبت والكسبرة والنعناع ) ونقطعها ناعم وصغير 

بعد ما تجف ماء الطماطم نضيف الخضرة المقطعة عليها ونقلب ونقفل النار  ثم نضيف الارز  ونظبط الملح والفلفل 

وكدة جهزنا الحشوة  ( لو حبينا نضيف لحمة معصجة مفرومة  حسب الرغبة )

نجهز الكرنب ونقطعه قطع صغيرة حسب الحجم اللي عاوزينه  ونبدأ باللف 

وهنا ست البيت الشاطرة تبان في لف الكرنب  ماتخليش ارز يطلع منك برة 

جهزي الحلة للتسوية  ونرص الاصابع بطريقة دائرية ... حتى ننتهي من كل المقدار

نجهز الشوربة  ونضعها على المحشي بحيث تغطيه بس .. ونرفعه على النار  ولما يبدأ في الغليان نهدئ النار 

تقريبا الوقت ساعة وربع يكون مستوي وجاهز 

ويكون بالشكل دة  وتقدميه مع دمعة  حمراء ( دي ورثاها من ستي لازم المحشي مع دمعة ولحمة او دجاج )

وبالهنا والشفا 

تم نشره في: أكلات مطبخ الأميرة