الفنانة رحاب البارودي وحوار حول موهبة الطبخ الأصيل




السلام عليكم ورحمة الله وبركاته




من منطلق أننا نبحث دائما عن الرقى واختيار الأفضل دائمااااا لموقعنا وصفحتنا على الفيس بوك  ....
ومن منطلق رغبتنا في التعرف اكثر على من تمتلك هذه الروح الجميلة التى غلب عليها الطابع الشرقي الاصيل
لم أكن اعرفها شخصيا .. ولكنني تابعت وبتعمق وصفاتها وأطباقها وتيقنت ان وراء هذا الأداء والتقنية والمهارة العالية في الاداء
فنانة تعرف جيدااا ماذا تريد ان تقدم لتبهرنا به .. فقد تفوقت على كثير والعديد من شيفات رأيتهم وتابعتهم
لذلك قرر مطبخ الأميرة المصرية ان يتقرب  منها اكثر  لنعرف من اين استمدت هذه الموهبة

1_ الفنانة رحاب .. ممكن تعرفينا بنفسك اكتر ؟

انا رحاب هانئ البارودى
درست فى كليه الفنون الجميلة
واشتغلت فى مجال اخراج الرسوم المتحركة فى استديوهات مصرية مشهورة
وتصميم الجرافيك والمالتى ميديا فى الأهرام وكنت مصممة الجرافيك لموقع الأهرام التعليمى لمدة عشر سنوات واستقلت من الاهرام من سنة ونصف
حاليا بحضر رسالة ماجستير فى فنون الكتاب فى كلية الفنون الجميلة
متزوجة من عشر سنوات من ايمن عادل استشارى موارد بشرية
عندى بنت 9 سنوات وولد 5 سنوات
بحب الرسم والكتابة والطبخ جدا جدا جدا

2 لكل واحدة شخصيتها بتظهر في اكلها.. ياترى الاستاذة رحاب اتأثرت بحد معين في طريقة الطبخ او التقديم ؟ 
 جدتى لأمى وأمى الله يرحمهم كان لهم طريقة مميزة جدا فى الطبخ وخصوصا الاكلات المصرية المشهورة وكان بيلفت انتباهى اوى ان والدتى وهى بتطبخ بتبقى فى حالة بهجة وانبساط وعندها رغبة حقيقية فى اشباعنا واسعادنا وامتعنا وكان لأكلها طعم مميز لايمكن تكراره
كمان فى طفولتى كان بيلفت انتباهى زوجه خالى التى كان لها طريقة شيك جدا جدا فى تقديم الطعام ومن ملاحظتها اتعلمت ان طريقة التقديم هى نص الطريق للطعم الشهى

3_ لكل منا بداياته في المطبخ  ياترى فاكرة ابتديتي من امتى ؟ ومين كان له دور انك توصلي لهذه الدرجة من الاتقان ؟
 الحقيقة انا ابتديت الطبخ بدرى جدا يعنى اول مرة طبخت كان عندى 12 سنة واتقنت كل اكلاتنا المصرية الأعتيادية فى سن 15 سنة ومع فترة الجامعه اصبحت قادرة على عمل عزومات كاملة بمفردى تضم لحوم ومحاشى وسلطات وشوربات لكن الحلويات اتقنتها بعد زواجى لان زوجى بيحب الحلويات جدا

4 ايه اول وصفة عملتيها وكنتي حاسة انها ناجحة اوي والكل اشاد بيها ؟
 الحقيقة مش فاكرة ايه أول وصفة عملتها والكل اشاد بيها بس لازم هنا اذكر ان امى الله يرحمها كانت بتشجعنى جدا جدا فى كل مرحلة من مراحل تدرجى فى اتقان الطبخ لدرجة انى اتذكر انى عملت كوروسون وكنت وقتها حوالى 16 سنة وكنت غير متقنة عملية لف الكروسون لانه اصلا يحتاج احترافية واتقان لكن طعمه كان جميل ومميز .... والدتى يومها اثنت على جمال طعمه ولم توجه لى اى نقد بخصوص شكل الكروسون اللى مش مظبوط واكتفت بانها قالتلى المرة الجاية يطلع شكله وطعمه احلى من بعض

5_ صور وصفاتك روعة ياترى مين دلك على فكرة التصوير والاحتفاظ باكلاتك ؟ واول اكلة صورتيها كانت ايه ؟
 الحقيقة جاتلى فكرة تصوير الطعام وانا مغتربة فقد عشت فترة خارج مصر فى الفترة دى كنت بدخل المواقع والمنتديات النسائية على الانترنت وكنت عضوة بمنتدى مشهور نسائى ولاحظت ان فيه بنات كتير بتتزوج وتسافر مع ازوجها قبل اتقان الطبخ وبتكون دى مشكله كبيرة لهم ففكرت اساعدهم بتصور أكله بخطواتها المصورة وهناك صورت اول طبق لى بكل مراحل اعداده وكان طبق له شعبية كبيرة فى بيتنا وهو طبق استيك بصوص المشروم مع أرز بالمشروم والفلفل الأخضر


 

6_ هل الفنانة رحاب من هواة مشاهدة برامج الطبخ .. وتطبيق ما يقدمونه ؟
 بحب جدا مشاهدة قناة فتافيت وفوود نتورك
وبالفعل طبقت وصفات عديدة من هذه القنوات

7_ بالنسبة لبرامج الطبخ هل تتميز بالواقعية وتناسب كل الفئات ؟
 اعتقد ان الطبخ ثقافة واتعكاس لروح الانسان نفسه اى انى بتفرج على برامج بيقدمها مذيعين من كل الجنسيات مش بالضرورة ان كل المكونات اللى بيشتغل بيها الشيفات اطباقهم متوافرة فى البيئة المحيطة بى ساعتها يجب علينا اننا نطوع خامتنا وفق المتاح .... بمعنى اخر اكيد مش المشاهدين قادرين عل شراء المكونات كما تقدمها برامج التليفزيون يبقى نحاول نستبدل المكون الغير متوفر بمكون اخر متاح ولا ندع عدم توفر الامكانيات المادية تحرمنا من مذاق شهى او تسبب لنا احباط ما
فمن نعم ربنا علينا تباين وتجانس وكثرة خيراته فى الارض ما بين رخيص وغالى
يعنى انا انبهرت مرة لما حورية المطبخ زينت تورتة بديعه بالحرنكش

8هل ثؤثر الحالة النفسية على اكلاتنا ؟
اكيد
انا لما بكون مش مبسوطة طبخاتى بتطلع مش بنفس روعه اطباقى وانا فى حالاتى المزاجية الاعتيادية
 
9_ كلنا بنتعرض لمواقف محرجة احيانا وخصوصا مع المطبخ .. ياترى ايه اكتر موقف محرج قابلك ؟
 كنت عاملة عزومة وكان الطبق الرئيسى غير كامل النضج رغم انى مش اول مرة اعمله ولحد النهاردة مش قادرة اعرف ايه كان السبب لان الضيوف مأكلوش الطبق و الموقف ده احرجنى جدا


10 _ الفيس بوك وصفحات الطبخ المنتشرة هنا وهناك  ما رأيك فيها ؟ وهل لديك صفحة خاصة بيكي ؟
 
حقيقى ربنا يجازى كل سيدة وانسة مسئولة عن صفحة او جروب طهى على الفيس بوك لانهم ساهموا فى مساعدة و اسعاد أسر بمشاركة هذا العلم والفن الجميل الذى لا نستطيع الحياة بدونه فلا حياة بدون غذاء

وانا اتشرف بأن ليا قسم خاص لوصفاتى على صفحة وصفات سهلة أوى
o
http://www.facebook.com/media/set/?set=a.10150191075944625.315102.101206384624&type=1

وقسم خاص لوصفاتى بجروب حناكل أيه النهاردة
o
http://www.facebook.com/media/set/?set=oa.10150203851150728&type=1
وقسم خاص لوصفاتى على جروب عشاق المطبخ
o
http://www.facebook.com/media/set/?set=oa.350955271588370&type=1

وايضا وصفاتى الصحية على جروبى الخاص على الفيس بوك هنخسر كام كيلو من وزننا الأسبوع ده؟؟
o
http://www.facebook.com/groups/107845972610544/

11_الفنانة رحاب هل ستحتفلي بالثورة يوم 25  وتنزلي الميدان  ( اي ميدان) للاحتفال ؟ ام ستكتفي بالمتابعة؟وهل تتوقعي ان يمر بسلام هذا اليوم ؟
مش ها أتحفل لأنى من الاخر مازلت غاضبة


12ياريت تقوليلنا على طريقة  للاولاد وازاي نحببهم في اخذ ساندويتشات من البييت معهم للمدرسة  فهي مشكلة تؤرق كل ام في كل صباح حيث يمتنع الاطفال ودائما يفضلون شراء الحلويات والشيبس من برة .؟
 أنا شخصيا مش لازم أدي أولادى سندوتشات كل يوم يعنى ممكن اعملهم يوم فرينش كيك بالجبن واللانشون ويوم كب كيك بالجوز أو البلح ويوم فطائر بحشوات بسيطة
قطعه او اتنين كفاية مع علبه عصير او لبن ممزوج بالفاكهة او الشيكولاته مع خيارة او برتقالة او تفاحة

13_ نصيحة من الفنانة رحاب للبنات المقبلين على الزواج في مجال المطبخ واصول الطبخ ؟
 
أهتمى بمطبخك جدا واختارى له ألوانك المفضلة وجمليه بكل ما يأتى على بالك وما يتاح لك
o اشترى القطع المهمة التى تسهل عليكى مهامك ولا تكدسيه بأدوات ثقيلة غير عمليه
o أبتعدى عن الأوانى الألمنيوم فهى غير صحية واستبدليها بتلك المطليه من الداخل بطبقات المينا
o اشترى الأدوات الكهربية العمليه الضرورية فليس كل ما هو متاح بالاسواق عملى او ضرورى وأهم شئ ان تكون القطعه اصليه حتى تعيش وقت معقول ليس بالضرورة طويل ولكن ايضا لاتخسر بمجرد عملها لسوء صناعتها
o اذا كنتى لا تتقنى الطبخ ففى الانترنت والكتب والمجلات ما يمكن ان يساعدك فلا حجة لكى لعدم اسعاد زوجك واسعاد نفسك معه بأكلات لذيذة من صنع يديكى
النظافة والتهوية الجيدة لمطبخك اهم شئ لابد ان تكونى حريصة عليه

14_ مين اكتر واحدة تعرفيها على الفيس بوك بتعجبك أطباقها ؟ 
 الحقيقة ناس كتير اوى
هقولك على اللى اعجبت بوصفات لهم ونفذتها وكانت وصفاتهم ناجحة جدا معايا :
أسيا عثمان
غادة التلى
علا عبد المنعم
سارة عبد السلام
رانيا عابدين

15هل هناك سؤال توقعتي اسأله وما سالتوش لحضرتك ؟
 توقعتك تسألينى عن طريقتى فى تنظيم وقتى والتوفيق بين ممارسة اهتماماتى الشخصية وتلبية طلبات اسرتى

16_ كلمة اخيرة للفنانة رحاب ............
فلسفتى فى ممارسة هواية الطبخ هى ان الطبخة الحلوة هى اللى مكونها الرئيسى الحب
فحبنا للناس اللى بنأكلهم بيخلى للأكل مذاق خاص سحرى
واخر حاجة احب اقولها ان رغبتى فى اسعاد زوجى وأولادى هو الدافع الحقيقى وراء إبداعى فى المطبخ




وبعد ما انهيت الحوار مع ضيفتنا الرائعة .. صدقوني لم اكن اعلم انها فنانة وانها خريجة فنون جميلة وانها عملت بالاخراج ايضا ..  ولكني وصفتها بالفنانة لأنني لامست فيها هذا الحس الرقيق من خلال اطباقها 
وعلمت ان هناك سيدة رائعة وراء هذا الفن في التقديم والتصوير 
وعندما تقربت منها لامست ايضا تلك الطيبة والأصالة المصرية 
نتمنى لها المزيد من التفوق في كل جوانب حياتها  
وان شاء الله نحتفل قريبا هنا ايضا بحصولها على الماجستير ان شاء الله
مع كل خالص حبنا واحترامنا لهذه الانسانة الرقيقة




مطبخ الأميرة المصرية

0 التعليقات:

إرسال تعليق

ضع تعليقك هنا

 
Design by Free Wordpress Themes | Bloggerized by Lasantha - Premium Blogger Templates | :